समाचारहरू

भारी वर्षा र बाढीको चपेटामा परी बालकसहित तीन जनाको मृत्यु भएको छ । साउन २६ गतेदेखि परेको अबिरल पानी र बाढीले छुट्टाछुट्टै दुई कच्ची घर भत्किँदा २८ गते २ जनाको मत्यु भएको छ । पचरौता गाउँपालिकाको बलधुसवामा जमुनी नदीमा आएको बाढीले बृद्धाश्रममा बसेका आदर्श कोतवाल गाउँपालिका ९ का ७० वर्षीय ब्रहमदेव महतोको मृत्यु भएको हो ।

सोही दिन सिम्रौनगढ नगरपालिका- ८ कचोर्वाका रामविलास पासवानको घर भत्किदा उनकी ४५ वर्षीया पत्नी गहनी देवी पासवानकी मृत्यु भएको हो । महागढीमाईस्थित पसाहा तथा भुतही खोलामा आएको बाढीमा डुबेर महागढीमाई नगरपालिका १ का नुरैन मियाँको १२ वर्षीय छोरा मैफुज मियाँको मृत्यु भएको छ । यी तिनै वटा घटनामा सात जनालाई प्रहरीले उद्धार गरेको छ ।

अविरल वर्षाले जमुनी, तियर, थलही, दुधौरा, बंगरी, पसाहा, अडुवा, लालबकैया लगायतका ठाउँका बासिन्दा परिवार उद्धार तथा राहतको लागि गुहार गरिरहेका छन् । उद्धारमा खटिएका प्रहरी उपरीक्षक राजकुमार वैद्यवारका अनुसार जिल्लाका २० हजार भन्दा बढी घरपरिवार राहतको प्रतीक्षामा छन् ।

लक्ष्मी सोनार