समाचारहरू

निरन्तरको वर्षाले सर्केगाड गाउँपालिका-१, फोक्सेस्थित दलित बस्ती उच्च जोखिममा रहेको छ । ३० घरधुरी रहेको उक्त दलित बस्ती नै बाढी पहिरोको उच्च जोखिममा रहेको हो ।

वर्षाले गरेको क्षतिको ध्यानाकर्षण गर्न वडा कार्यालयमा दैनिक नारा लगाउँदा पनि स्थानीय तह अन्तर्गतका वडा कार्यालयका जनप्रतिनिधिले सुनुवाइ नगरेको स्थानीय झवला नेपालीले गुनासो गर्नुभयो । उक्त बस्ती वरिपरि बाढी पहिरो आएर गाउँ नै लाने सम्भावना छ । गाउँमा बस्न समेत कठिनाई भएको स्थानीय नेपालीले गुनासो गर्नु भएको हो । बाढी पहिरोका कारण गाउँ बस्ती उच्च जोखिममा रहेपछि यस क्षेत्रका नागरिक अहिले चिन्ता जनक रूपमा बस्दै आएका छन् ।

दैनिक वडा कार्यालयमा पुगेर स्थानीयले ध्यानार्कषण गराएपछि साउन २६ गते जनप्रतिनिधि र राजनीति दलका नेताहरूले उक्त बस्ती अनुगमन गरेको सर्केगाड गाउँपालिका-१ का वडाध्यक्ष बलबहादुर कार्कीले जानकारी दिनुभयो । उहाँका अनुसार गाउँको दायाँबायाँ तिर पहिरो खस्ने जोखिम रहेको र उक्त बस्तीका लागि स्थानीय सरकारले केही सोच्नु पर्ने भएको छ । तर वडाले अरु केही गर्न नसके पनि तत्काल ५० हजार रुपियाँ बराबरको बस्तीमा पुग्नको लागि बाटो निर्माण गर्ने र बस्ती विस्तारका लागि गाउँपालिकासँग समन्वय गर्ने अध्यक्ष कार्कीको भनाइ छ ।

नेपलाको संविधान २०७२ को मौलिक हक अन्तर्गत धारा ३७ मा आवासको हकको व्यवस्था गरिएको भए पनि फोक्सेमा अवस्थित दलित परिवारहरू ज्यान जोखिममा रहेर बस्न बाध्य भएका छन् ।

नन्द सिंह