वरिष्ठ अधिवक्ता त्रिपाठीलाई कुटपिट गरेको आरोपमा तीन जना गिरफ्तार

  ०८१ माघ ७ गते

वरिष्ठ अधिवक्ता डा. दिनेशकुमार त्रिपाठीलाई कुटपिट गरेकको आरोपमा झापाको बुद्धशान्ति गाउँपालिका-४ घर भई काठमाडौँ महानगरपालिका-३२ शान्तिनगर बस्ने ५५ वर्षीया सीतादेवी राईलाई माघ ७ गते गिरफ्तार गरेको जिल्ला प्रहरी परिसर काठमाडौँले जनाएको छ ।

त्यसैगरी हुम्लाको अदानचुली गाउँपालिका–४ घर भई  काठमाडौँ सुर्यदर्शन हाइट बस्ने ३२ वर्षीय महेन्द्र पाण्डेलाई माघ ६ गते  र  दोलखा तामाकोशी गाउँपालिका-१ घर भई ललितपुरको महालक्ष्मी नगरपालिका-५ टिकाथली बस्ने ४८ वर्षीय ललित कुमार केसीलाई  माघ ४ गते गिरफ्तार गरेको प्रहरीले जनाएको छ ।

आफूमाथि आक्रमण गर्नेलाई कारबाही गर्न बरिष्ठ अधिवक्ता त्रिपाठीले प्रहरी वृत्त सिंहदरबारमा उजुरी दिनु भएको थियो ।

यही माघ २ गते राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध अदालतमा बहस गरेकै कारण सो पार्टीका समर्थकले वरिष्ठ अधिवक्ता त्रिपाठीलाई कुटपिट गरेका थिए ।


पार्बती साउद