समाचारहरू

बाफीकोट गाउँपालिका-४ निवासी त्रिभुवन जनता मावि मुसिकोटमा कक्षा नौ मा अध्यनरत १५ वर्षीय बालक पूर्णजङ्ग खड्कालाई प्रहरीले वयस्क थुनुवासँग हिरासतमा राखेको छ ।

नेत्रविक्रम चन्द नेतृत्वको नेपाल कम्युनिष्ट पार्टीमा आबद्ध भई निर्वाचन विथोल्न खोजेको आरोपमा खड्कालाई वैशाख १८ गते प्रहरीले आठविसकोट नपा-१ बाट गिरफ्तार गरेको थियो । बालकलाई सार्वजनिक अपराधको मुद्दा लगाई जिल्ला प्रहरी कार्यालयको हिरासत कक्षमा राखिएको प्रहरीले जनाएको छ ।

चुनाव विथोल्नका लागि कम्युनिष्ट पार्टीमा आबद्ध भएकाले मुद्दा प्रकृया अगाडि बढाइएको जिल्ला प्रहरी कार्यालय रुकुमका डिएसपी अङ्गुर जिसीले बताए । बालकलाई राख्ने अन्य ठाउँ नभएको हुँदा वयस्क थुनुवासँगै राखिएको डिएसपी जिसीको भनाइ छ ।

बालबालिका ऐन २०४८ अनुसार १६ वर्षभन्दा कम उमेरका बालबालिकालाई वयस्कसँग थुन्न नपाउने र अभिभावकको जिम्मा लगाउनु पर्ने उल्लेख भएपनि पूर्णजङ्गलाई प्रहरीले वयस्क थुनुवासँग राखेको छ ।

पूर्णजङ्गको रिहाईका लागि पहल गरिदिन पीडितका बाबु चन्द्रबहादुर खड्काले इन्सेकलाई अनुरोध गरेका छन् । छोरासँगै गिरफ्तार परेका चन्द्रबहादुरले आफ्नो छोराको जन्म ०५८ फागुन २२ गते भएको बताए । छोरालाई प्रहरीले गैरकानुनी गिरफ्तार गरी बाल अधिकार हनन् गरेको खड्काले आरोप लगाए ।

प्रहरीले चुनाव विथोल्ने गतिविधि गरेको आरोपमा कम्युनिष्ट पार्टीका २५ जनालाई वैशाख १८ गते आठविसकोट नपा-१ बाट गिरफ्तार गरेको थियो । गिरफ्तार गरेका मध्ये १९ जनालाई सार्वजनिक अपराधको मुद्दा दर्ता गरेको छ भने अन्यलाई रिहा गरेको प्रहरीले जनाएको छ ।

आदर्श केसी