वडा सचिव नहुँदा दैनिक कामकाजमा समस्या

 

जन्तेढुङ्गा गाउँपालिकाका सबै वडामा वडा सचिव नहुँदा दैनिक कामकाज सञ्चालन गर्न समस्या भएको छ ।

६ ओटा वडा रहेको गाउँपालिकामा कार्यरत सबै सचिव सरूवा भएर अन्यत्र गएपछि गाउँपालिका नै सचिवविहीन भएको हो ।

जन्तेढुङ्गा गाउँपालिका-६ दिप्लुङमा कार्यरत एक मात्र वडा सचिव शम्भु आचार्य सोलुखुम्बु सरूवा भएपछि सिङ्गो गाउँपालिका सचिवविहिन बन्न पुगेको हो ।

त्यस्तै, जन्तेढुङ्गा गाउँपालिका-३ काहुलेका वडा सचिव मेघराज आचार्य अन्यत्र सरूवा भएपछि दिप्लुङमा मात्र वडासचिव बाँकी रहेका थिए । वडा सचिव नहुँदा चिसापानी, दिप्लुङ र देवीस्थानको वडा सचिवकको काम प्राविधिक भीम कार्कीमार्फत सञ्चालन भइरहेको गाउँपालिका प्रमुख शङ्कर राईले बताए ।

बोपुङ र डम्बर्खुशिवालयको वडा सचिवको काम कार्यालय सहायक कृष्ण कट्वालमार्फत भइरहेको छ । 'वडा सचिव छैनन् । सेवाका लागि आएका जनताको काम रोक्नु पनि भएन ।'-गाउँपालिका प्रमुख भूपेन्द्र राईले भने-'सचिव नभएपछि कुनै वडाको काम प्राविधिक र कार्यालय सहयोगी कै भरमा सञ्चालन गरिरहेका छौँ ।'

काहुलेमा कुनै पनि कर्मचारी छैनन् । गाउँपालिकका अनुसार देवीस्थान, बोपुङको काम गर्दै आएका सचिव ढुण्डीराज दुलाल काठमाडौँ र डम्बर्खु शिवालयमा कार्यरत लक्ष्मी फुँयाल सुनसरी सरूवा भएका छन् ।

यस्तै, बराहापोखरी गाउँपालिकाका ६ ओटै वडामध्ये ५ ओटा वडामा सचिव छैनन् । बराहापोखरी गाउँपालिका-४ फाक्टाङ बाहेकका वडामा वडा सचिव नभएको जिसस खोटाङका प्रमुख बबि चाम्लिङले बताए ।

बराहापोखरी गाउँपालिकाको सुन्तले, साउनेचौर, खोटेहाङ गाउँपालिका-१ लिकुवापोखरी वडामा वडा सचिव छैनन् । जिल्ला समन्वय समितिका अनुसार खोटेहाङ गाउँपालिका नौमध्ये तीन वडा सचिवविहिन छन् । खोटेहाङ गाउँपालिका-३ सावाकटहरे, खोटेहाङ गाउँपालिका-६ इन्द्रेणीपोखरी र खोटेहाङ गाउँपालिका-१ लिकुवापोखरीमा वडा सचिव छैनन् ।

त्यस्तै दिप्रुङ गाउँपालिका-२ डाडागाउँ र ५ सछितापोखरी पनि वडा सचिवविहीन बनेको छ । ऐंसेलुखर्क गाउँपालिका-७ माक्पा र केपीलासगढी गाउँपालिका-२ खार्ताम्छा पनि सचिव छैनन् ।

कार्यरत वडा सचिव सरूवा भए पनि ऐंसेलुखर्क गाउँपालिका माक्पामा अर्को कर्मचारी आएको छैन । कार्यरत सचिव मनोज खतिवडा सरूवा भएको लामो समय बित्दासमेत डाडाँगाउँमा अर्को सचिव आउन नसकेको दिप्रुङ गाउँपालिकाले जनाएको छ ।

जनप्रतिनिधिको कडाईका कारण पनि कतिपय सरूवा मिलाउँदै अनुकूल कार्यालयमा जान थालेका छन् । वडामा आफूखुसी चल्ने वातावरण बन्द भएकाले सचिवले काम गर्न अप्ठेरो मान्ने गरेको दिपु्रङ गाउँपालिकका प्रमुख भूपेन्द्र राईले बताए ।

'परिषद र सामाजिक सुरक्षा भत्ता बाँड्नका लागि मात्र गाउँ पुग्ने सचिवलाई वडामै बसेर काम गर्न अप्ठेरो महसुस भएको छ ।'-प्रमुख राईले भने ।


सुनिता मगर