समाचारहरू

छायाँनाथ रारा नगरपालिका भित्रका १४ वडाका वडा अध्यक्षले वडा कार्यालयको व्यवस्थापन, मसलन्दलगायत सेवा सुविधाको रकम अहिलेसम्म निकासा नदिएको भन्दै वडा कार्यालय अनिश्चितका लागी तालाबन्दी गरेपछि सेवाग्राही मर्कामा परेका छन् ।

छायाँनाथ रारा नगरपालिका भित्रका १४ वडाका वडा अध्यक्षहरूले पहिलो चौमासिकको पाउने सेवा सुविधादेखि घर भाडा, बिजुली, सञ्चार, मसलन्द खर्च अहिलेसम्म पनि नगरपालिकाले निकासा नदिएपछि रकम अभावकै कारण दैनिक कार्य सञ्चालन गर्न बाधा पुगेको भन्दै असोज १८ गतेदेखि अनिश्चितकालका लागि नगरपालिकाका १४ वटै वडा कार्यालय तालाबन्दी गरेका छन् ।

तालाबन्दीका कारण वडाबाट प्रवाह हुने सेवा बन्द हुँदा सेवाग्राही मर्कामा परेका छन् ।

नगरपालिकाको तेस्रो नगर परिषदले १४ वटै वडा कार्यालय व्यवस्थापनका लागि १० लाख रुपियाँ बजेट विनियोजन गरेको थियो ।

विनियोजित बजेट वडा कार्यालयलाई निकासा नदिँदा वडा कार्यालयको दैनिक कार्य सञ्चालन गर्न बजेट अभाव भएकाले वडा कार्यालय बन्द गर्नु परेको २ नम्बर वडाका अध्यक्ष परेक चौलागाईले बताए ।

सिंह दरबारको अधिकार वडामा पुगेको भनिएपनि सेवाग्राहीको काम काजका लागि एक पन्ना सेतो कागज र डटपेन माग्नलाई नगरपालिका पुग्नु पर्ने भएकाले कार्यालय बन्द गरेको वडाध्यक्षहरूले जनाएका छन् ।

प्रदेश सरकारले स्थानीय तहका जन प्रतिनधिहरूको सेवा सुविधाबारे राजपत्रमा प्रकाशित गरिसकेको छ । ‘सपथ लिएको मितिदेखि अहिलेसम्मको सेवा सुविधा पनि पाएका छैनौँ । सेवा सुविधा पाएको भएपनि कार्यालयको सानो तिनो व्यवस्थापन आप्mनै खर्चमा गर्न सकिने थियो ।’–वडा नम्बर ४ का अध्यक्ष विष्णुकुमार भामले भने ।

दैनिक कार्य सञ्चालनका लागि घर भाडा, बिजुली र मसलन्द खर्चका लागि विल अनुसार भुक्तानी दिने भनी सबै वडाका अध्यक्षलाई जानकारी गराइसकेको नगरपालिकाका मेयर हरिजङ्ग शाहीले बताए ।

जीवन सेजुवाल