समाचारहरू

जुगल गाउँपालिका–५ का वडा अध्यक्ष सनतकुमार अधिकारीलाई कुटपिट गरी घाइते बनाएको आरोपमा सोहि ठाउँका पाँचजनालाई प्रहरीले गिरफ्तार गरेको छ ।

आरोपितहरुले ०७६ माघ २० गते चनौटे स्थित श्री रत्नराज्य माविको वार्षिक उत्सव कार्यक्रम सकेर सोहि विद्यालयको क्यान्टीनमा खाजा खानलाग्दा कुटपिट गरी घाइते बनाएको पीडितपक्षले बताएका छन् । घाइते वडा अध्यक्षको भक्तपुर स्थित ठिमिको अस्पतालमा उपचार भइरहेको वडा सचिव रामचन्द्र घिमिरेले बताउनुभयो ।

आरोपितहरु बिरुद्ध ०७६ माघ २१ गते जिल्ला प्रहरी कार्यालयमा घाइते वडा अध्यक्षको तर्फबाट भाइ  सन्तोष अधिकारीले उजुरी दिएको जिल्ला प्रहरी कार्यालयका डीएसपी माधवप्रसाद काफ्लेले बताउनुभयो । घाइते वडा अध्यक्ष नेपाली काँग्रेसबाट निर्वाचित हुन् भने कुटपिट गर्नेपक्ष नेकपाका गाउँस्तरिय कार्यकर्ता भएको वडा सचिव रामचन्द्र घिमिरेले बताउनुभयो । राजनीति प्रतिशोधका आधारमा कुटपिट गरेको घाइतेका भाई सन्तोष अधिकारीको दावि छ ।

प्रहरीले जुगल गाउँपालिका–५ का १९ वर्षीय सुरेश आलेमगर, सोहि ठाउँका २१ वर्षीय समुन्द्र श्रेष्ठ, २० वर्षीय रत्नबहादुर मगर, २१ वर्षीय सुभाष मगर र २० वर्षीय कमल थापा मगरलाई ०७६ माघ २१ गते सोहि वडा स्थित घ्यादुङबाट गिरफ्तार गरेको हो ।

नातिबावु धिताल