वडा अध्यक्षलाई असहयोग गरेको भन्दै हत्या गरेको आरोपमा उजुरी

  ०७९ जेठ ८ गते

जीतपुरसिमरा उपमहानगरपालिका–२० का वडा अध्यक्ष ६५ वर्षीय रसुलमीयाँ अन्सारीलाई स्थानीय तह निर्वाचनमा असहयोग गरेको आरोपमा सोही वडाको बसडिल्वा गोठ टोलका २१ वर्षीय दिपक पासवानको जेठ ३ गते हत्या गरेको आरोपमा मृतककी आमा सुनैनादेवी पासवानले जेठ ७ गते आरोपितविरूद्ध जिल्ला प्रहरी कार्यालयमा उजुरी दिनु भएको छ ।

इलाका प्रहरी कार्यालयको प्रहरीले घर नजिकै कठोह हरपुर खोलामा गाडेको अवस्थामा जेठ ६ गते शव उत्खनन् गरी कलैया अस्पतालमा पोष्टमार्टमका लागि लगेको जिल्ला प्रहरी कार्यालयका डिएसपी राजेश थापाले बताउनु भयो ।

कलैया अस्पतालका मेडिकल सुपरिटेण्डेण्ट गौरव महतोले जेठ ८ गते पोष्टमार्टम प्रतिवेदन दिने बताउनु भयो ।

पीडित परिवारले पोष्र्टमार्टम प्रतिवेदन दिएपछि मात्र अन्तिम संस्कारका लागि शव जिम्मा लिने र पोष्र्टमार्टम प्रतिवेदन नआएमा शव जिम्मा नलिने जनाएको छ ।

मृतक पासवानले स्थानीय तह निर्वाचनमा नेपाल कम्युनिष्ट पार्टी एकीकृत समाजवादी पार्टीका वडा सदस्यका उम्मेदवार वीरेन्द्र पासवानलाई सहयोग गरेको रिसमा हत्या गरेको आरोप छ ।

रसुलमियाँ अन्सारी सोही वडाको नेपाल कम्युनिष्ट पार्टी एमालेको तर्फबाट उम्मेदवार हुनुहुन्थ्यो ।

पासवानले नेकपा एसका उम्मेदवारलाई भोट माग्दा वैशाख २० गतेदेखि पटकपटक विवाद भएको मृतककी आमा सुनैनादेवीले बताउनु भयो ।

उहाँले विवाद हुँदा सोही वडाका २० वर्षीय तालाम अन्सारीले रसुलमियाँले जिते भने ज्यान मार्ने धम्की दिएको आरोप लगाउनु भएको छ ।

जेठ ३ गते ज्यान मार्ने उद्देश्यले आक्रमण गरेको पीडित परिवारको आरोप छ । आक्रमण गर्दा छिमेकीले रोकेकाले हत्या गर्न नसकेको र हत्या गरी दिने धम्की दिएर गएको मृतककी आमाले बताउनु भयो ।

जेठ ३ गते ज्यान मार्ने योजना बनाएर घरदेखि ५ सय मिटर पश्चिम रहेको कठोह हरपुर खोला लगी धारिलो हतियारले घाँटी रेटी खोलाको पूर्व किनारामा गाडी दिएको मृतककी आमाको आरोप छ ।

आरोपितलाई गिरफ्तार गरी हदैसम्मको कारवाही गरी नेपालको प्रचलित कानुन बमोजित क्षतिपुर्ति दिलाइ पाउँ भनी पीडित पक्षले दिएको उजुरीमा माग गरिएको छ ।
जीतपुरसिमरा उपमहानगरपालिका–२० बसडिल्वा टोलका ६५ वर्षीय वडा अध्यक्ष रसुलमियाँ अन्सारी, ४४ वर्षीय शेख आरफ, २२ वर्षीय तालाम अन्सारी, २० वर्षीय शेखनवी आलम र २१ वर्षीेय शेख सलिमले हत्या गरेको पीडित परिवारको आरोप छ ।

घटनाको अनुसन्धान गरी दोषीलाई कारवाही गर्न प्रदेश सभा र प्रतिनिधि सभामा आवाज उठाउन पहल गर्ने प्रदेश सभा सदस्य सुन्दर विश्वकर्माले इन्सेक जिल्ला प्रतिनिधि भोलानाथ पौडेललाई जानकारी गराउनु भएको छ ।

मृतककी आमाले इन्सेक जिल्ला प्रतिनिधिसँग घटनाको सत्यतथ्य पत्ता लगाउन सहयोग माग्नु भएको छ । घटना अनुसन्धान भइरहेको जिल्ला प्रहरी कार्यालयका डिएसपी राजेश थापाले बताउनु भयो ।


भोलानाथ पौडेल