समाचारहरू

खत्याड गाउँपालिका-८ का नवनिर्वाचित वडाध्यक्ष रामबहादुर रावतले प्रहरी चौकी सुकाढिकमा असार १० गते सुरक्षाको माग गरेका छन् । अज्ञात व्यक्तिको समूहले असार ९ गते राति मार्ने धम्की दिएको भन्दै उनले प्रहरी समक्ष सुरक्षाको माग गरेका हुन ।

वडा कार्यालयको भवन भाडामा लिई कार्यालय सञ्चालन गरेका रावतलाई सोही भवनमा सुतिरहेको अवस्थामा दुई जनाको सङ्ख्यामा आएका व्यक्तिले मार्ने धम्की दिएको अध्यक्ष रावतले बताए ।

अध्यक्ष रावत भन्छन-'राति सुतिरहेको समयमा आएका व्यक्तिले ढोका खोल्न भनेको र ढोका नखोलेपछि फलामे छड राखेको झ्याल फुटाउने प्रयास गरे ।' झ्याल फुटाउन नसकेपछि मार्ने धम्की दिएको रातवले जानकारी दिए । धम्कीपछि असुरक्षाका कारण आफू रातभर खाटमुनी सुतेको रावतले बताए ।

घटना सम्बन्धमा जिल्ला प्रहरी कार्यालयका डिएसपी शारदाप्रसाद चौधरीले प्रहरी चौकी सुकाढिकमा निवेदन आएको बताउँदै यस विषयमा थप अनुसन्धान भइरहेको बताए ।

अध्यक्ष रावत वैशाख ३१ गते सम्पन्न स्थानीय तहको निर्वाचनमा नेपाली काङ्ग्रेसका तर्फबाट वडा नम्बर ८ को अध्यक्ष पदमा निर्वाचित भएका थिए । निर्वाचित भएपछि वडाको काम काज साविकको सुकाढिक गाविस भवनमा हुँदै आएपनि असार ९ गतेबाट निजी घर भाडामा लिएर कार्यालय सञ्चालन गरेका थिए ।

जीवन सेजुवाल