समाचारहरू

देवघाट गाउँपालिका-४ का अध्यक्ष पदमबहादुर गुरूङले मदिरा सेवन गरी कार्यालय समयमै वडा सचिव भोजनारयण श्रेष्ठलाई कुटपिट गरेको पीडितले आरोप लगाएका छन् ।

चैत १३ गते पौने पाँच बजे अत्याधिक मदीरा सेवन गरी कार्यालय आएका वडा अध्यक्ष गुरूङले कार्यालयको काम गरेर बसिरहेका सचिव श्रेष्ठलाई कार्यालय बाहिर बोलाई एक्कासी कुटपिट गरेको पीडित पक्षको आरोप छ ।

वडा अध्यक्षले एक्कासी आफूमाथि कुटपिट गर्न थालेपछि स्थानीयबासिन्दाले अध्यक्षलाई रोकेको मौकामा भागेर ज्यान जोगाएको सचिव श्रेष्ठले बताए । 'म कार्यालय भित्रै काम गरिरहेको थिएँ । अध्यक्ष रक्सीले मातेर कार्यालयमा आई मलाई बाहिर बोलाएर एक्कासी लछारपछार गर्न थाले ।'

सचिव श्रेष्ठले भने-'गाउँलेहरूले नसमातेको भए मलाई जे पनि हुन सक्थ्यो ।' ४०/५० जना गाउँलेहरूले अध्यक्षलाई समाएर आफूलाई भगाएको सचिव श्रेष्ठले बताए । वडा अध्यक्ष गुरूङले यस अघि पनि दुर्व्यवहार गरेको उनले बताए ।

वडा अध्यक्ष गुरूङले भने कुटपिट नगरेको बताएका छन् । आफू गाउँ जाँदा गाउँलेहरूले भुकम्पले भत्किएको घर बनाउन चाहिने कागजपत्रको बारेमा सोधेपछि त्यसबारेमा सचिवसँग फोनमा बुझ्न खोज्दा सचिवले फोन नउठाएको र गाउँबाट फर्केर वडा कार्यालयमा आई किन फोन नउठाएको भनेर सोधपुछ गर्दा सचिव झर्किएको अध्यक्ष गुरूङले आरोप लगाए । सो क्रममा भनाभन हुँदा दुई जनाबिच सामान्य धकेलाधकेल भने भएको अध्यक्ष गुरूङको भनाई छ ।

देवघाट गाउँपालिकाका कर्मचारीहरू वडा सचिव माथिको आक्रमणले काम गर्ने कुनै वातावरण नभएको भन्दै चैत १४ गते बुधबार गाउँपालिको काम ठप्प पारी धर्नामा बसेका छन् । उनीहरूले संयुक्त विज्ञप्ति प्रकाशित गरी 'गुण्डागर्दीको शैलीमा प्रस्तुत हुने वडा अध्यक्षलाई कारवाही नभएसम्म गाउँपालिकाको सम्पुर्ण कामकाज ठप्प पार्ने' बताएका छन् । साथै कर्मचारीहरूले सुरक्षाको प्रत्याभूतीको माग समेत गरेका छन् ।

यसैबिच देवघाट गाउँपालिकाका अध्यक्ष दुर्गबहादुर थापाले वडा अध्यक्षबाट गल्ती भएको हुँदा जुन ठाउँमा घटना भएको सोही ठाउँमा आम भेला राखी सचिवसँग माफी माग्नु पर्ने बताएका छन् ।

सबै जनताले उक्त घटना प्रत्यक्ष रूपमा देखेको हुँदा जनताकै अगाडि वडा अध्यक्षले सचिवसँग माफी माग्नुपर्ने गाउँपालिका अध्यक्ष थापाको भनाई छ ।

प्रकाशचन्द्र भट्टराई