वडा अध्यक्षद्वारा मतदान केन्द्रमा वितरण गर्न राखिएका मतदाता परिचय पत्र कब्जा

  ०७९ वैशाख २८ गते

तामाकोशी गाउँपालिका वडा नम्बर १ भिरकोटमा रहेको मतदान केन्द्रमा वितरणका लागि राखिएका मतदाता परिचय पत्र वैशाख २८ गते दिउँसो सोही वडाका वडा अध्यक्षले कब्जामा लिएर फरार भएका छन् ।

मतदान केन्द्रमा वितरणका लागि लगिएका १ सय २५ ओटा मतदाता परिचय पत्र बोकेर वडा अध्यक्ष महेश काफ्लेले फरार भएको जिल्ला प्रहरी कार्यलयका प्रमुख डिएसपी गंगा पौडेलले जानकारी दिनुभयो ।

मतदाता परिचयपत्र बोकेर मतदान केन्द्रबाट तीव्र गतिमा दौडिएका काफ्लेले मतदान केन्द्र भन्दा केही पर तयारी अवस्थामा राखिएको स्कोरपियो प्रयोग गरेर भागेका थिए ।

प्रहरीले पछ्याउन थालेपछि काफ्लेले आफ्ना सहयोगीलाई मतदाता परिचयपत्र छोडेर भागेका र उनका सहयोगीले ती परिचयपत्र प्रहरीलाई बुझाएका छन् ।

वडा अध्यक्षबाटै मतदाता परिचयपत्र असुरक्षित होला भन्ने प्रहरीले अनुमान समेत नगरेको प्रमुख पौडेलको भनाई छ ।

काफ्ले स्थानीय निर्वाचन २०७४ मा नेपाली कांग्रेसको तर्फबाट उम्मेदवारी दिई निर्वाचित भएका थिए ।


उद्धव पोखरेल