वडाध्यक्षलाई कुटपिट घटनाका आरोपितविरुद्ध प्रहरीले उजुरी लिन नमानेको आरोप

राजपुर नपा–१ का ४० वर्षीय शेष अमिरुल्लाहलाई सोही ठाउँका नेपाली कांग्रेसका कार्यकर्ता ६० वर्षीय शेख अबदुल, ५० वर्षीय खैरुल्लाह, ४२ वर्षीय शेख अजित र ४५ वर्षीय शेख मुस्तकलगायत करिब ३०/४० जनाको समूहले ०७८ वैशाख ३० गते निर्वाचनको दिन कुटपिट गरी घाइते बनाएको आरोपमा जिल्ला प्रहरी कार्यालयमा पटक–पटक उजुरी लिएर जाँदा प्रहरीले उजुरी दर्ता गर्न नमानेको पीडितको आरोप छ ।

स्थानीय तहको निर्वाचनको दिन करिब ४ बजेतिर नेपाली कांग्रेसका कार्यकर्ताहरूले बुथ कब्जा गर्न खोजेको र सो कार्यलाई प्रहरीले कडाइका साथ निगरानीमा राखेको थियो ।

त्यसपछि माओवादी केन्द्रका वडाध्यक्षका उम्मेदवार शेष अमिरुल्लाहले थाहा पाएर मोटरसाइकलमा सो स्थानबाट नजिकैको सशस्त्र प्रहरी बेश क्याम्पतिर भाग्दा क्याम्प नजिक करिब २ सय मिटरको नजिक पुगेपछि मोटरसाइकलमा आएका आरोपितहरूले घेरा हाली कुटपिट गर्दा हात भाँचिएको तथा टाउकोमा गम्भीर चोट लाग्नुका साथै अन्य भागहरूमा पनि चोट लागेको पीडितको आरोप छ ।

घटना लगत्तै घाइतेको उपचार प्रादेशिक अस्पताल गौरमा गरी जेठ ६ गते डिस्चार्ज गरिएको पीडितको भनाइ रहेको छ ।

जिल्ला प्रहरी कार्यालय गौरमा जेठ ४, ५ र ६ गते जाँदा उजुरी दर्ता गर्न नमानेको पीडितको आरोप छ ।

जिल्ला प्रहरी कार्यालयका एसपी विनोद घिमिरेले घटनाका विषयमा अनुसन्धान गर्ने प्रतिबद्धता व्यक्त गरे पनि उजुरी दर्ता नगरेको पीडितको भनाइ छ ।

एसपी घिमिरेले प्रारम्भिक अनुसन्धान गर्दा पछाडिबाट मोटरसाइकलले लखेटेको तर आफँै लडेर हात भाँचिएको विषय खुल्न आएकोले थप अनुसन्धान भइरहेको बताउनु भयो ।

प्रारम्भिक अनुसन्धानले आफैँ लडेको भन्ने भएर उजुरी दर्ता नभएको र दुवै पक्षले एकले अर्कालाई आरोप लगाएको र अर्को पक्षको पनि घरमा चोरी गर्न आएको आरोप लगाएकोले अनुसन्धान गरेर मात्र मुद्दा दर्ता गर्ने एसपी घिमिरेले बताउनु भयो ।


कोपिला तिमल्सिना