समाचारहरू

नेपाल लोकतान्त्रिक फोरम र नेपाली काङ्ग्रेसका कार्यकर्ताबिच ईशानाथ नपा-७ जोकाहा टोलमा असोज २२ गते राति झडप हुँदा सात जना बालबालिकासहित २४ जना घाइते भएका छन् ।

ईशानाथ नगरपालिकामा नगर कार्यसमितिको निर्वाचनपछि नेपाल लोकतान्त्रिक फोरमले विजय जुलुश निकालेको अवस्थामा राति करिब ७ बजेको समयमा जोकाहा गाउँमा आइपुगेपछि जुलुशमाथि नेपाली काङ्ग्रेसका कार्यकर्ताहरूले आमक्रमण गरेको फोरम लोकतान्त्रिकले आरोप लगाएको छ ।

नेपाली काङ्ग्रेसका कार्यकर्ताहरूको आक्रमणमा परी ईशानाथ नपा-७ की सात वर्षीया आयसा खातुन र सोही ठाउँका नौ वर्षीय महमद आदिम गम्भीर घाइते भएकाले उनीहरूको उपचार बीरगञ्जमा उपचार भइरहेको छ । गम्भीर घाइते भएका दुई जना बालबालिकाको गौर अस्पतालमा उपचार हुन नसकेकाले बीरगञ्ज 'रिफर' गरिएको र अन्य घाइतेहरूको गौर अस्पतालमा उपचार भइरहेको प्रहरीले जनाएको छ ।

त्यस्तै आक्रमणमा परी ईशानाथ नपा-७ का ३० वर्षीया हसिना खातुन, १५ वर्षीय मोजरे आलम, ३५ वर्षीय रयसुन खातुन, १२ वर्षीया यासमिन खातुन, ३० वर्षीया सदिना खातुन, ५० वर्षीया जुलेखा खातुन, १८ वर्षीया मरेनाद खातुन, आठ वर्षीष गुलखेदा खातुन, आठ वर्षीया फुलनाद खातुन, ४० वर्षीय सेख अनवार, ४२ वर्षीया सजिना खातुन र ३० वर्षीया सफातुन खातुन घाइते भएको जिल्ला प्रहरी कार्यालय रौतहटले जनाएको छ । घाइते उनीहरूको शरीरमा रड तथा लाठीको चोट रहेको जिल्ला अस्पताल गौरले जनाएको छ ।

घटनापछि प्रहरी घटनास्थलमा पुगी स्थिति नियन्त्रणमा लिएपनि आक्रमण गर्ने कसैलाई पनि नियन्त्रणमा लिएको छैन । जिल्ला प्रहरी कार्यालय रौतहटका एसपी यज्ञविनोद पोखरेलले आक्रमणकारीहरू फरार रहेकाले तत्काल गिरफ्तार गर्न नसकिएको प्रतिक्रिया दिएका छन् ।

विपिन गौतम