समाचारहरू

लोकतन्त्रमा निर्वाचन अपरिहार्य हुने भएकाले निर्वाचन सफल बनाउनु सबैको दायित्व हुने राष्ट्रिय मानव अधिकार आयोगका पूर्व आयुक्त एवम् इन्सेकका संस्थापक अध्यक्ष सुशील प्याकुरेलले बताएका छन् ।

पूर्व आयुक्त समाजः राष्ट्रिय मानव अधिकार आयोगको आयोजनामा जेठ २९ गते जिल्ला सदरमुकाम खलङ्गामा आयोजित स्वच्छ, निष्पक्ष र विश्वसनीय निर्वाचन विषयक अन्तरक्रिया कार्यक्रममा बोल्दै पूर्व आयुक्त प्याकुरेलले भने-'मत दिन्न भन्न पाइन्छ । तर, निर्वाचन भाँड्ने अधिकार कसैमा छैन ।'

पहिलो चरणको निर्वाचनमा देखिएका चुनौतीलाई समाधान गर्न सबै निकायले आआफ्नो ठाँऊबाट भूमिका निर्वाह गर्नुपर्नेमा उनले जोड दिए । 'निर्वाचनमा चुनौती देखिएकाले नै दुई चरणमा निर्वाचन गरिएको हो ।'-उनले भने-'भरतपुरमा मत च्यातेको घटनाले थप संवेदनशील बनाएको छ ।'

स्वतन्त्र निर्वाचनका लागि प्राविधिक र सैद्धान्तिक वातावरण बनाउनुपर्नेमा उनको जोड थियो । निर्वाचन आयोगलाई अधिकार सम्पन्न गराउन नसक्दा पटक-पटक चुनाव सार्ने, निर्वाचन चिन्ह प्रदानमा विवाद देखिने जस्ता घटना भएको उनको तर्क थियो ।

कार्यक्रममा बोल्दै पूर्व आयुक्त डा.गौरीशङ्कर लालदासले निर्वाचन प्रक्रियामा कसैले बाधा पुर्‍याउन नहुनेमा जोड दिए । तराईमा राष्ट्रिय जनता दल र पहाडमा नेपाल कम्युनिष्ट पार्टीले निर्वाचन बहिष्कारको नीति लिएकाले यसलाई शान्तिपुर्ण बनाउन सुझाव समेत दिए ।

प्रमुख जिल्ला अधिकारी यदुनाथ पौडेलले प्यूठानका मतदाताले आफ्नो मताधिकार स्वतन्त्र रूपले प्रयोग गर्ने वातावरण रहेको उल्लेख गरे । निर्वाचन तयारीका विषयमा जानकारी दिँदै जिल्ला न्यायाधीश तथा मुख्य निर्वाचन अधिकृत बासुदेव न्यौपानेले निर्वाचन आचारसंहिता पूर्ण रूपमा पालना गर्न दलहरूलाई आग्रह गरे ।

कार्यक्रमका सहभागीहरूले निर्वाचनमा बालबालिकाको प्रयोग नगर्न, महिलालाई समेत प्रमुखमा उम्मेदवार बनाउन, तडकभडकको चुनावी प्रचार नगर्न दलहरूलाई सुझाव दिए ।

रविन्द्र पाण्डे