समाचारहरू

लैङ्गिक हिंसाविरूद्धको १६ दिवसीय अभियान मङ्सिर ९ गतेदेखि सुरू भएको छ । यस वर्षको नारा ‘घरैबाट सुरू गरौँ, महिला हिंसा अन्त्य गरौँ’ भन्ने छ । यो दिवस हरेक वर्ष नोभेम्बर २५ तारिखदेखि डिसेम्बर १० तारिखसम्म विश्वभर मनाउने गरिन्छ ।

संयुक्त राष्ट्रसङ्घको सन् १९९९ को महासभाले नोभेम्बर २५ तारिखलाई महिला हिंसाविरूद्धको दिवसका रूपमा मनाउने निर्णय गरेपछि अभियानकै रूपमा विश्वभर यो दिवस मनाउन थालिएको हो । नेपालमा भने ०५४ सालदेखि यो दिवस मनाउन थालिएको हो ।

मोरङ प्रतिनिधि अर्जुन दर्जीका अनुसार इन्सेकसहित विभिन्न सङ्घसंस्था र सामाजिक विकास मन्त्रालयको सहभागितामा लैङ्गिक हिंसाविरूद्ध १६ दिवसीय अभियान सुरूआतका क्रममा विराटनगरमा प्रभातफेरी र्‍याली निकालिएको छ ।

जिल्ला प्रशासन कार्यालयबाट सुरूआत भएको प्रभातफेरी र्‍याली सामाजिक विकास मन्त्रालय अघि कोणसभामा परिणत भएको थियो । कोणसभामा सामाजिक विकास मन्त्री जयराम यादवले सबैले आ-आफ्नो ठाउँबाट महिला हिंसाविरूद्धको अभियान चलाउन आवश्यक रहेको बताउनु भयो ।

उदयपुर प्रतिनिधि सुजाता ढुङ्गानाका अनुसार इन्सेकसहित दुई दर्जन बढी सामाजिक सङ्घसंस्थाको अगुवाइ लैङ्गिक हिंसा विरूद्धको १६ दिवसीय  अभियान सुरूआत गरिएको छ । अभियानको सुरूआत प्रदेश सांसद अम्बिका थापाले गर्नु भयो ।

सदरमुकाम गाईघाट बजार परिक्रमा गर्दै प्रभातफेरी निकालिएको थियो । प्रभातफेरीमा घरै देखि सुरु गरौँ, महिला विरूद्धको हिंसा अन्त्य गरौँ, महिला रोकिए संसार रोकिन्छ जस्ता विभिन्न नारा लेखिएका पोष्टरहरू र्‍यालीमा सहभागीहरूले देखाएका थिए ।

खोटाङ प्रतिनिधि तारानाथ फुयलका अनुसार इन्सेकसहित विभिन्न सङ्घसंस्थाको आयोजनामा लैङ्गिक हिंसाविरूद्धको १६ दिवसीय अभियान सुरूआतका क्रममा प्रभातफेरी र्याली निकालिएको छ ।

प्रभातफेरीमा प्रमुख जिल्ला अधिकारी फणिन्द्र दहाल, डिएपसपी उमेश लम्सालसहित विभिन्न सङ्घसंस्थाका प्रतिनिधिहरूको सहभागिता रहेको थियो ।

तेहृथुम प्रतिनिधि सुरेश खत्रीका अनुसार लैङ्गिक हिंसाविरूद्धको १६ दिवसीय अभियानका क्रममा जिल्लामा प्रभातफेरी कार्यक्रम गरिएको छ । प्रभातफेरीमा इन्सेकसहित सरकारी तथा विभिन्न सङ्घसंस्थाका प्रतिनिधिहरूको सहभागिता रहेको थियो ।

सङ्खुवासभा प्रतिनिधि भविन कार्कीका अनुसार इन्सेकसहित नागरिक सङ्घसंस्थाको अगुवाइमा महिला हिंसाविरूद्धको १६ दिवसीय अभियानको सुरूआत गरिएको छ ।

अभियानका क्रममा इन्सेकले जिल्लामा सरोकारवालासँग समन्वय र सहकार्य गरी मानवता विरूद्धका सबै किसिमका घटना अन्त्यका लागि इन्सेक क्रियाशील भएको अभियानका क्रममा जानकारी गराइएको छ । इन्सेकले अभिलेख गरेका महिला र बालबालिकासँग सम्बन्धित घटनाका विषयमा सरोकारवालामा जानकारी गराइएको छ ।

खाँदबारी नगरपालिकाको आयोजनामा ‘घरैबाट शुरू गरौँ, महिला हिंसा अन्त्य गरौँ’ भन्ने मूल नाराका साथ विभिन्न सङ्घसंस्थाको सहभागितामा नयाँ बजारबाट प्रभातफेरी र्याली निकालिएको छ ।

सचेतनामूलक व्यानर तथा प्लेकार्ड सहितको र्‍याली निकालिएको खाँदबारी नगरपालिकाका महिला तथा बालबालिका शाखा प्रमुख शारदा नेपालले बताउनु भयो । र्‍यालीमा जिल्ला समन्वय समितिका प्रमुख सुमन शाक्य, प्रमुख जिल्ला अधिकारी नुरहरी खतिवडा, खाँदबारी नगरपालिकाका उपप्रमुख डेगेस्वरी श्रेष्ठले लगायतको उपस्थिती रहेको थियो ।

ओखलढुङ्गा प्रतिनिधि सरस्वती बानियाका अनुसार लैङ्गिक हिंसाविरूद्ध १६ दिवसीय अभियानको सुरूआतमा सदरमुकामसहित बजार क्षेत्रका मुख्य चोक र कार्यालयहरूमा हिंसा न्यूनीकरण सम्बन्धिको चेतनामुलक व्यानर टाँसेर दिवसको सुरूआत गरिएको छ ।

इन्सेकसहित विभिन्न सङ्घसंस्थाको आयोजनामा हिंसा न्यूनीकरण सम्बन्धी चेतनामुलक व्यानर टाँसेर दिवसको शुभारम्भ गरिएको छ ।

इलाम प्रतिनिधि बविता मैनालीका अनुसार महिलाविरूद्ध हुने सबै किसिमका हिंसा न्यूनीकरणका लागि जिल्लाका स्थानीय तहहरूले विभिन्न कार्यक्रमको सुरूआत गरेका छन् ।

स्थानीय तहले महिलाविरूद्ध सञ्चालन गर्ने अभियानमा इन्सेकले समन्वय एवम् सहकार्य गर्ने भएको छ ।

इन्सेक प्रदेश १ कार्यालय, विराटनगर