समाचारहरू

लैङ्गिक हिंसा विरुद्धको १६ दिने अभियानको सुरुवातको अवसरमा मङ्सिर १० गते धादिङबेसीमा लैङ्गिक हिंसाविरुद्ध प्रभातफेरी कार्यक्रमको आयोजना गरिएको छ ।

नीलकण्ठ नगरपालिकाको सहकार्यमा इन्सेक, पत्रकार महासङ्घ, गैरसरकारी संस्था महासङ्घ लगायतका नागरिक सङ्घसंस्थाको सहभागितामा प्रभातफेरी कार्यक्रमको आयोजना गरिएको हो ।

लैङ्गिक हिंसाविरुद्ध लाग्ने प्रतिवद्धता सहितको र्‍यालीले पुछारबजारबाट एमालेचोक, बिचबजार र सिरानबजार हुँदै नीलकण्ठ नगरपालिकाको सिटी हलमा पुगेर कोणसभामा परिणत गरिएको थियो ।

डोमिनिकन गणराज्यमा भएको महिलामाथिको ज्यादतीको विरुद्धबाट सुरु भएको अभियान संसरभर नोभेम्बर २५ देखि डिसेम्बर १० सम्म मानव अधिकार तथा महिला अधिकारका बारेमा समीक्षा, सूचना तथा शिक्षा दिँदै सञ्चालन गर्ने गरिन्छ ।

प्रभातफेरी पछि कोणसभालाई महिला मानव अधिकार रक्षक अधिवक्ता राधिका सापकोटाले महिलामाथि हुने हिंसा अन्त्यका लागि बेइजिङ घोषणालाई कार्यान्वयन गर्नु रहेको बताउँदै स्थानीय सरकारले नीतिगत रुपमा महिला  अधिकारका लागि कार्ययोजना ल्याउनुपर्ने बताउनु भयो ।

नीलकण्ठ नगरपालिकाका उपप्रमुख दिपक विश्वकर्माले स्थानीय सरकारले महिला अधिकार र लैङ्गिक हिंसा प्रभावित सहयोग कोष बनाएकोले आगामी दिनमा प्रभावकारी कार्यक्रम ल्याउने बताउनु भयो । प्रभातफेरीमा नागरिक समाज, स्थानीय सरकार, जनप्रतिनिधि, नेपाल प्रहरी, सशस्त्र प्रहरी, नगर प्रहरीलगायतको सहभागिता रहेको थियो ।

सीताराम अधिकारी