समाचारहरू

लैङ्गिक हिंसा रहिरहँदासम्म समृद्ध नेपाल र सुखी नेपाली भन्ने नाराले सार्थकता नपाउने प्रदेश ५ का सामाजिक विकास मन्त्री सुदर्शन बरालले बताउनुभएको छ ।

सामाजिक विकास मन्त्रालय प्रदेश ५ ले बुटवलमा आयोजना गरेको ‘समानताको पुस्ताः बलात्कार विरूद्धको ऐक्यबद्धता’ विषयक सरोकारवाला बीचको अन्तरक्रिया कार्यक्रममा बोल्दै मन्त्री बरालले उक्त कुरा बताउनुभएको हो ।

प्रदेशमा ५ हिंसाको हिसावले अग्रस्थानमा भएकोले यस्ता खालका लैङ्गिक हिंसा अन्त्य गर्नका लागि प्रदेश सरकार सक्रिय भएर हिंसाका विरूद्ध विभिन्न कार्यक्रम बनाएर प्रदेशका हरेक जिल्लामा पु¥याउने मन्त्री बरालले बताउनु भयो ।

उहाँले लैङ्गिक हिंसा विरूद्धको १६ दिने अभियानमा के कस्ता कार्यक्रम ? कसरी सञ्चालन गर्न सकिन्छ ? भन्ने विषयमा सबै सरोकारवालासँग समन्वय गरेर रचनात्मक रूपमा अगाडि बढाउनका लागि सहज बनाउने उद्देश्यले कार्यक्रमको आयोजना गरिएको बताउनुभयो ।

उहाँले सङ्घीयता आएपछि इतिहासमै पहिलो पटक सात ओटा प्रदेशका लागि १ अरब १४ करोड बजेट विनियोजन भएको बताउनुभयो ।

कार्यक्रममा  प्रदेश ५ का उपसभामुख कृष्णी थारूले लैङ्गिक हिंसा विरूद्धको १६ दिने अभियानलाई सफल पार्नका लागि नीति भएर मात्र नपुग्ने बताउनुभयो ।

‘हामीले नारा सुन्दर बनाउन जानेका छौँ । सुन्दर नाराले मात्र पीडितले न्याय पाउन सक्दैनन् । पीडितले न्यायको अनुभूति गर्ने गरी भएका नीति तथा कार्यक्रमहरूको कार्यान्वयन गर्नुपर्छ ।’–उहाँले भन्नुभयो ।

प्रदेश सांसद सुनिताकुमारी ठटेरले मधेशी समुदायमा लैङ्गिक हिंसाको अवस्था दर्दनाक भएकाले स्थानीय सरकारले यस विषयमा संवेदनशील हुनुपर्नेमा जोड दिनुभयो ।

बुटवल उपमहानगपालिकाकी उप–प्रमुख गुमादेवी आचार्यले लैङ्गिक हिंसा भनेको महिलाको मात्र सवाल नभएको भन्दै यसको अन्त्यका लागि सबै एक जुट भएर लाग्नुपर्ने बताउनुभयो ।

रीमा बिसी