लिमीमा पुगेन पाठ्यपुस्तक, विद्यार्थी पठनपाठनबाट वञ्चित

  ०८१ वैशाख ११ गते

जिल्लाभरका सामुदायिक विद्यालयमा पाठ्यपुस्तक पुगेर पठनपाठन सुरु भए पनि नाम्खा गाउँपालिका–६ को हिमालपारिको गाउँ लिमीका विद्यालयमा हालसम्म पाठ्यपुस्तक पुग्न सकेको छैन । सिमकोटमा आइपुगेका पाठ्यपुस्तक लिमी ल्याउन नसकिएको नाम्खा गाउँपालिका–६ का वडा अध्यक्ष पाल्जोर तामाङल  जानकारीदिनु भयो ।

जिल्लामा शैक्षिकसत्र सुरु भएको दुई महिना बितिसक्दा पनि लिमिका विद्यार्थीको हातमा पाठ्यपुस्तक नपुग्दा विद्यार्थी पठनपाठनबाट वञ्चित भएको अध्यक्ष तामाङले बताउनुभयो ।

पाठ्यपुस्तक ढुवानीको जिम्मा लिएको रोकाया पुस्तक पसलबाट पुस्तक सुनखानी आधारभूत विद्यालयका प्रधानाध्यापक कर्णजित बुढाले बुझेको भए पनि लिमी जाने ४ हजार ६ सय मिटर अग्लो नारा र पाँच हजार मिटर अग्लो न्यालु लेकमा हिउँ जमेकाले पाठ्यपुस्तक ढुवानीमा कठिनाइ भएको प्रधानाध्यापक बुढाले बताउनुभयो ।

लिमीमा पुस्तक कहिलेसम्म ढुवानी गर्न सकिन्छ भन्ने कुरा अहिले नै भन्न नसकिने प्रधानाध्यापक बुढाले बताउनुभयो ।
सदरमुकाम सिमकोटमा पुगेका पाठ्यपुस्तक विद्यालयसम्म नपुगेपछि आफुहरुको पठनपाठनमा प्रभावित भएको कक्षा ७ मा अध्यायनरत छात्र फुर्वा आङमु तामाङले गुनासो गर्नुभयो ।

सो विषयमा नाम्खा गाउँपालिका शिक्षा शाखा प्रमुख मनराज बुढालाई बुझ्दा उहाँले न्यालु र नारा लेखको बाटो हिमपातले बन्द भएका कारण पाठ्य पुस्तक रोकिएको बताउनुभयो । न्यालु भन्दा नारा लेख छिटो खुल्ने भएकाले अवको केही समयमा स्थानीयलाई बोकाएर लैजाने बताउनु भयो। विद्यार्थीले हाल केही पुराना पाठ्यपुस्तकबाट पठनपाठन गर्दै आएको उहाँले जानकारी दिनुभयो ।

कक्षा ७ सम्म पढाइ हुने सो विद्यालयमा १३ जना बालविकासका विद्यार्थी छन् भने कक्षा १ मा चार जना, २ मा चार जना, ३ मा तीन जना, ४ मा दुई जना, ५ मा तीन जना, ६ मा दुई जना र ७ मा दुई जना विद्यार्थी अध्ययनरत छन् ।


नन्द सिंह