समाचारहरू

अत्तरपुर गाविस-८ का १ सय ३७ भूकम्पपीडित घर परिवार लालपुर्जा नहुँदा अवास पुनर्निर्माण अनुदान सम्झौताबाट वञ्चित भएका छन् ।

०४२ सालमा नापीका लागि सरकारी टोली गाउँ पुग्दा प्रधानपञ्च र कम्युनिष्टहरू बीच झडप भएपछि सो ठाउँको जग्गा नापी नक्सा हुन नसकेको स्थानीयको भनाइ छ ।

लालपुर्जा नहुनेसँग अनुदान सम्झौता नगर्नु भन्ने सरकारको नीति भएकोले राहत पाउनबाट वञ्चित भएको स्थानीय कमल श्रेष्ठले बताए ।

श्रेष्ठका अनुसार बहुदलीय व्यवस्थापछि नापी गराउन पहल कदमी भएपनि हालसम्म नापी नभएका कारण समस्या आएको हो ।

उक्त गाविसको अन्य वडाका भूकम्पपीडितलाई घर पुनर्निर्माणको लागि अनुदान सम्झौता भएर पहिलो किस्ता रकम उपलब्ध गराइएपनि वडा नं ८ का १ सय ३७ घर परिवारले लालपुर्जा नभएका कारण सम्झौता गर्न नपाएको पुनर्निर्माण प्राधिकरण जिल्ला सम्पर्क कार्यालयका संयोजक भूवनेश्वर लामिछानेले बताए ।

नातिबावु धिताल