समाचारहरू

गोसाइकुण्ड गाउँपालिका–४ को लाङटाङ स्वास्थ्य चौकीमा औषधि अभाव भएपछि बिरामीले सहज उपचार पाउन सकेका छैनन् ।

यहाँ आउने स्वदेशी पर्यटकहरू स्वास्स–प्रस्वास, जीउदुख्ने, छाती दुख्ने समस्याले बिरामी भएर स्वास्थ्य चौकीमा पुग्दा औषधि सकिएको भन्दै स्वास्थ्यकर्मीले फिर्ता पठाएको इन्सेक प्रतिनिधिसँग फागुन २९ गते लाक्पा तामाङले बताउनुभयो ।

सरकारले स्वास्थ्य संस्थाबाट ३५ प्रकारका औषधि निःशुल्क प्रदान गर्ने भने पनि गाउँमा औषधि अभाव भएपछि सेवाग्राही मर्कामा परेका छन् ।

नजिकै सामान्य औषधि पाउने ठाउँ पनि छैन दुई दिन लगाएर स्याफ्रुबेशी पुग्नुपर्ने बाध्यता रहेको गुनासो सेवाग्राहीको गुनासो रहेको छ ।

सरकारले प्रदान गर्ने निःशुल्क औषधि भन्दा भिन्न औषधि हाइअल्टिच्युटको समस्याको औषधि माग हुने भएकोले औषधि प्रदान गर्न नसकेको लाङटाङ स्वास्थ्यचौकीका इन्चार्ज खुम्बु बोहोराले बताउनुभयो ।

बोकेर ल्याउनुपर्ने हुनाले औषधि ढुवानी गर्न समस्या भएको तथा केही  औषधिहरू सकिएकोले गाउँपालिकामा माग गरी पाएको बोहोराले जानकारी दिनु भयो ।

गोसाइकुण्ड गाउँपालिका स्वास्थ्य शाखा बिमल घिमिरेका अनुसार सरकारले निःशुल्क प्रदान गर्ने केही अत्यावश्यक औषधिहरू अभावको हुन नदिन गाउँपालिका लागिपरेको बताउनुभयो ।

औषधि अभाव हुन नदिने भौगोलिक कठिननाइले केही ढिलाइ भने हुने गरेको उहाँले स्वीकार्नु भयो ।

हेमनाथ खतिवडा