समाचारहरू

‘विभिन्न किसिमका घोषणा गर्ने र नागरिलाई आश्वस्त पार्ने बाहेक सरकारले क गरेको छ र ? यहाँ न गाविसको कार्यालय छ, न सरकारी निकायको स्वास्थ्य निकाय नै !’–लाङटाङका स्थानीयहरूको प्रतिक्रिया हो यो । ‘राज्यका विभिन्न निकायका संरचनासमेत नभएको लाङटाङमा स्थानीयबासीले सरकार विहीनता कहिलेसम्म भोग्नु पर्ने हो ?’–स्थानीय डोल्मा तामाङले प्रश्न गरिन् ।

नागरिकले राज्यबाट सुरक्षा, स्वास्थ्य, शिक्षाको सेवा अनुभूति गर्न पाउनु पर्ने हो । अझ विनाशकारी भूकम्प पछि त गुमेको आवासको पुनर्निर्माणको कुरा छ । सुरक्षित आवासको अधिकार कसरी पाइन्छ र अधिकार नपाए कहाँ गएर गुनासो गर्ने भन्ने थाहा नभएको तामाङले गुनासो गरिन् ।

‘सरकारी प्राविधिक पनि आन्दोलनमा लागे कसले आवास निर्माणको अनुमगन गर्ने ?’–स्थानीयको गुनासो छ । पुनर्स्थापना तथा पुनर्निर्माणका कुरा धेरै उठे पनि निकासका लागि सरकारी पक्षबाट खासै पहल नभएको उनीहरूको आरोप छ ।

एकै ठाउँमा पुरै बस्ती क्षति भएको लाङटाङमा नजिकैको स्थान छनौट गरेर पुनर्निमाणका लागि स्थानीबासी कसिएका छन् । यस किसिमके कामले क्यान्जिङ पुरानै अवस्थामा आएको छ भने लाङटाङ पनि उठ्दै गरेको प्रष्टै हुन्छ ।

यस अघि यहाँ गाविस, स्वास्थ्य चौकी, प्रहरी तथा सैनिक पोष्ट रहेको थियो । भूकम्पमा सुरक्षाकर्मीहरूको मृत्यु भयो भने चेक पोष्ट र ब्यारेक पनि भत्कियो । त्यसयता अहिलेसम्म यहाँ कुनै निकायको उपस्थिति छैन ।

हेमनाथ खतिवडा