लगातार विद्यालय बन्द हुँदा पठनपाठन प्रभावित

  ०७३ मङ्सिर ७ गते

सीमाङकनको विवादमा दैलेख इलाका नं. ७ का तीन गाविसका राजनीतिक दलहरूले गरेको बन्दको कारण जिल्लाका करिब ४० विद्यालयको पठनपाठन एक सातादेखि प्रभावित भएको छ । बन्दको क्रममा कालभैरव, गौरी र मालिका गाविसको कार्यालय समेत मङ्सिर २ गतेदेखि बन्द भएका छन् ।

गमौडी गाविस समेतलाई समावेश गरी ज्वालामालिका गाउँपालिका बनाइनुपर्ने माग राखेर स्थानीयबासी आन्दोलित भएका हुन् ।

यसैबिच इन्सेक दैलेख जिल्ला प्रतिनिधि अमर सुनारले मङ्सिर ७ गते कालभैरवका दिपेन्द्र आधारभूत विद्यालय र ज्वाला माविका विद्यालय व्यवस्थापन समितिका पदाधिकारी, विद्यालय प्रशासनका कर्मचारी, विद्यार्थी, अभिभावक र आन्दोलनकारी समेतको उपस्थितिमा विद्यालय खुलाउने सन्दर्भमा छलफल चलाएका छन् । उनले विद्यालय शान्ति क्षेत्र घोषणा कार्यान्वयनसम्बन्धी छलफल चलाइएको बताएका छन् । छलफलमा सहभागी आन्दोलनकारीले विद्यालयमा नियमित पठनपाठनको विषयमा सकारात्मक टिप्पणी गरेका थिए भने विद्यार्थीले अबिलम्ब विद्यालय खोल्न आग्रह गरेका थिए ।

आन्दोलनकारीले आफ्नो माग पूरा नहुँदासम्म मङ्सिर ८ गतेदेखि जिल्ला सदरमुकाममा शक्ति प्रदर्शन गर्ने जनाएका छन् ।


इन्सेक मध्यपश्चिमाञ्चल क्षेत्रीय कार्यालय, नेपालगञ्ज