समाचारहरू

मङ्सिर १४ गते देखि गरिएको लगातारको बन्दका कारण गुल्मीबासीको जनजीवन कष्टकर बनेको छ । बन्दका कारण सरकारी कार्यालयका सेवाहरू प्रभावित हुनुका साथै गरिखाने वर्गका मानिसलाई निकै सास्ती भएको छ ।

व्यापार घाटा भएपनि राष्ट्रियता जोखिममा परेकाले महिनौ व्यावसाय बन्द गर्नु परेपनि पछि नहट्ने उद्योग वाणिज्य सङ्घका महासचिव तारा भुसालले बताए ।

आन्दोलन सुरु गरेको १३ औँ दिन सदरमुकाम तम्घासमा भएको विशाल आमसभालाई एमाले नेता प्रदिप ज्ञवाली, काङ्ग्रेस नेता चन्द्र भण्डारी, एमाले सांसद कमला विश्वकर्मालगायतले सम्बोधन गरेका थिए ।

सदरमुकाममा आयोजित विरोध सभालाई सम्बोधन गर्दै एमाले नेता ज्ञवालीले जस्तोसुकै मुल्य चुकाएर भएपनि ५ नं प्रदेश टुक्र्याउन नदिने बताए । त्यस्तै काङ्ग्रेस नेता चन्द्र भण्डारीले आफुहरू मधेशको विरोधी नभएर राष्ट्रियता जोगाउने सवालमा आन्दोलनमा रहेको बताए । सरकारले यहाँका नागरिकलाई घुँडा टेकाउने सोचमा रहेको भए आफैले घुँडा टेक्नुपर्ने अवस्था आउने उनको भनाइ रहेको थियो ।

सरकारले संसदमा दर्ता गरको संशोधन प्रस्तावको विरोधमा आन्दोलनमा उत्रिएका आन्दोलनकारीहरूले हिजो मानव साङलो बनाएर सरकारी कार्यालय घेराउ गरेका थिए । हिजै साँझ उनीहरूले सदरमुकामदेखि रिडी बजारसम्म ४५ किलोमिटर राँके जुलुस निकालेका थिए ।

टोपलाल अर्याल