समाचारहरू

सानो वाङ्थली गाविस-७ की ३२ वर्षीया लक्ष्मी परियारलाई पोलमा बाँधेर अभक्ष खुवाएको भन्ने विषयलाई लिएर पुस १ गते जिल्लामा कार्यरत सङ्घसंस्थाले प्रमुख जिल्ला अधिकारीलाई ज्ञापन-पत्र बुझाएका छन् ।

वाङ्थली घटनाको निष्पक्ष छानबिनको माग गर्दै बुझाइएको ज्ञापन-पत्रमा कुनै जातीय संस्था वा अधिकारका नाममा अपराधमा संलग्न व्यक्तिलाई जोगाउने र सिकाउने काम नगरियोस् भनिएको छ । प्रहरीले कसैको दबाव वा प्रभावमा परेर घटनाको निश्पक्ष अनुसन्धानमा गल्ती नगर्न र घटनाहरूमा संलग्न सबैलाई कानुन अनुसार कारबाही गर्न माग गरिएको छ ।

ज्ञापनपत्रमा भनिएको छ-'बनेपाबाट ६७ किलोमिटरको दुरीमा रहेको लक्ष्मीको घरभन्दा ५ सय मिटर दुरीमा रहेको रामबहादुर उप्रेतीको गोठमा मङ्सिर २४ गते लक्ष्मी परियार मृत अवस्थामा फेला परेको भन्ने छ । शिक्षण अस्पताल काठमाडौँमा मङसिर ३० गते गरिएको लासको पोष्टमार्टममा संलग्न डाक्टरहरूले टाउकोदेखि पैतालासम्म एकनासको कुटाईका कारण लक्ष्मीको मृत्यु भएको र पोष्टमार्टम गर्न ढिलाई गरेको बताएका छन् ।' घटनाका विषयमा राष्ट्रिय मानवअधिकार आयोग, राष्ट्रिय दलित आयोग र इन्सेक लगायतका संस्थाहरूले स्थलगत अध्ययन गरेको ज्ञापन-पत्रमा उल्लेख छ ।

मृतकको भाइ लोकबहादुर परियारले मङ्सिर २५ गते जिल्ला प्रहरी कार्यालय धुलिखेलमा (दर्ता नम्बर ११२/८-२६) कर्तव्य ज्यान शीर्षकमा जाहेरी दिएका छन् । घटनाको अनुसन्धानका लागि मृतकका पति मिलन परियार र उनको एकदमै मिल्ने साथी हिरा लामालगायत चार जना प्रहरी हिरासतमा छन् । यस घटना सम्बन्धमा मङ्सिर २१ गते आरोपितले प्रहरीमा दिएको ठाडो उजुरी परिवर्तन गर्ने प्रहरी चौकी चौबासका असई पनि परिवर्तन भएका छन् ।

सन् २०१६ मा मात्र काभ्रेमा परिबारबाट ६ जना महिलाको हत्या भएको छ । पनौती नपा-१३ की २८ वर्षीया सम्झना थापालाई उनकै पतिद्वारा टाउकोमा बन्चरो र हसिँया प्रहार गरी हत्या गरेको आरोप छ । माझिफेदा गाविस-८ की ५० वर्षीया सुकरानी तामाङलाई फलामको बन्चरोले टाउकोमा प्रहार गरी हत्या गरियो । माझिफेदा गाविस-१ मा नाङ्गो पारेर कुटपिट गरी मारिएको अवस्थामा मिनाकुमारीको लास फेला परेको थियो । उग्रचण्डी नाला-४ भुलेगाँउकी ३६ वर्षीया विष्णुमाया तोलाङ्गेलाई उनकै पतिले टाउकोमा बन्चरो प्रहार गरी हत्या गरे । कतै यो घटना पनि परिवारको मिलोमतोमा हत्या गरेर भाग्नेक्रममा उप्रेतीको प्रयोगविहीन गोठमा पुग्दा मृत्यु भएको वा परिवारले योजनाबद्ध रूपमा मारेर त्यहाँ लगेर राखिएको त हैन ? भन्ने आशंका पैदा भएको ज्ञापन-पत्रमा उल्लेख छ ।

भोजराज तिमल्सिना