लक्षित वर्गको रकमबाट महिनावारी भएका महिलाले नुहाउने धारा निर्माण

  ०७४ असार १६ गते

कनकासुन्दरी गाउँपालिका-२ साविकको मालिकाबोता गाविसले लक्षित वर्गको रकम महिलाको 'छुई' नुहाउने धारा निर्माणमा खर्च गरेको छ । साविकको तीन ओटा वडामा छुई नुहाउने धारा निर्माणमा खर्च भएको स्थानीयले बताएका छन् ।

साविकको मालिकाबोता गाविस-२, ३ र ६ मा छुई नुहाउने धारा निर्माण भएको स्वास्थ्य चौकीका अहेव जानदेवि बुढाले बताइन् । जुम्लामा छाउपडी न्यूनीकरणका अभियान चलिरहेको भएपनि मालिकाबोतामा छुट्टै छुई नुहाउने धारा निर्माण हुनु लजास्पद भएको उनको भनाइ छ ।

साविकका मालिकाबोता गाविसका सचिव अम्मरराज गिरीले लक्षित वर्गको रकम अन्तर्गत महिलाको रकम छुई नुहाउने धारा निर्माणमा खर्च भएको बताए । चालु आर्थिक वर्षमा महिलाको शीर्षकमा छुट्याइएको रकमबाट तीन ओटा वडामा छुई नुहाउने धारा निर्माणमा खर्च भएको उनले बताए ।

साविकको मालिकाबोता गाविसका राजनीतिक दल र बुद्धिजीविको रोहबरमा महिला छई भएको बेला नुहाउने धारा निर्माण गरिएको उनको भनाइ छ ।

साविकको वडा नम्बर २ मा १ लाख २५ हजार, वडा नम्बर ३ मा ५० हजार र वडा नम्बर ६ मा १ लाख ६५ हजार रुपियाँको लागतमा छुई नुहाउने धारा निर्माण गरिएको सचिव गिरीले जानकारी दिए । गतवर्ष वडा नम्बर १ मा २० हजार रुपियाँको लागतमा छुई नुहाउने धारा निर्माण गरिएको उनको भनाइ छ ।

'लक्षित वर्गको रकम अन्तर्गत महिलाको नाममा आएको रकम सशक्तिकरणमा खर्च गरौँ भनेको हुँ । गाविसका स्थानीयले नमानेपछि छुई नुहाउने धारा निर्माण गर्नुपर्‍यो ।'-सचिव गिरीले भने । अहिले छाउपडी प्रथा न्यूनीककरणको अभियान चलिरहेको समयमा यस्तो कार्य गर्नु राम्रो नहुने भनेको तर स्थानीय स्तरमा सुनुवाइ नभएको सचिव गिरीको भनाइ छ ।

गाउँबासीको मागका आधारमा छुई नुहाउने धारा निर्माण गरिएको सचिव गिरीले बताए । बहुमतले गरेको निर्णय गाविसले पालना गर्नुपर्ने बाध्यता भएको सचिव गिरीको भनाइ छ ।


मानदत्त रावल