समाचारहरू

लक्षित वर्गको नाममा आउने विनियोजित बजेट सम्पूर्ण रूपमा खर्च हुन नसकी फ्रिज हुने र खर्च भएको बजेट समेत दुरुपयोग हुँदै आएको सरोकारवालाले आरोप लगाएका छन् ।

जिल्ला विकास समिति सप्तरीमा लक्षित वर्गको २ करोड ५० लाख रुपियाँमध्ये १ करोड ५५ लाख ५४ हजार मात्र खर्च भएको जिविसका अधिकृत गङ्गाराम साहले बताए ।

लक्षित वर्गको कार्यक्रम अन्तर्गत अधिकांश रकम जनचेतना कार्यक्रमका लागि भनेर निकटका गैरसरकारी संस्थाहरूमा बाँडिने र असारको अन्त्यमा कागजी प्रकृया पुर्‍याएर कार्यक्रमहरू सम्पन्न गरी बजेट दुरुपयोग हुने गरेको नेपाल पत्रकार महासङ्घ सप्तरीका पूर्व सभापति बैद्यनाथ झाले आरोप लगाए ।

आर्थिक वर्ष २०७२/०७३ मा रौतहट गाविसको विकासीय बजेटसहित कूल बजेट ११ लाख रुपियाँ वडा नम्बर १ देखि ७ सम्म खर्च भएको रौतहट गाविसका प्राविधिक सहायक विष्णुदेव यादवले बताए ।

उनका अनुसार आर्थिक वर्ष २०७१/०७२ मा समेत महिला, दलित, बालबालिकालगायत लक्षित वर्गको बजेट विद्युतीकरणमा खर्चियो । बैरवा गाविसमा आर्थिक वर्ष २०७२/०७३ मा आएको लक्षित वर्गको बजेट चर्पी निर्माण तथा खानेपानीमा खर्च गरिएको छ । महिलाको नाममा आएको बजेट महिलामै खर्चिने भनी स्वयम्सेविकाको प्रोत्साहन भत्ता तथा पोशाक वितरणमा खर्चिदैँ आएको छ ।

महिला, बालबालिकाका लागि आएको मौवाहा गाविसको बजेट विगत पाँच वर्षदेखि स्थानीय विद्यालयको शिक्षकको तलबमा खर्च हुने गरेको छ । रामनगर गाविसका सरोकारवालालाई लक्षित वर्गका लागि आएको बजेटबारे थाहा नै नभएको प्रतिक्रिया दिएका छन् । लक्षित वर्गको रकम जानकारी नदिई अन्यत्र खर्च हुने परिपाटी रहेको जनचेतना दलित सङ्गमका सहजकर्ता ईन्द्रप्रसाद रामले बताए ।

बजेट दुरुपयोग भएको प्रशस्त गुनासो आउने गरेको स्वीकार गर्दै जिविस सप्तरीका योजना अनुगमन तथा प्रशासकीय अधिकृत धीरेन्द्रकुमार यादवले विगतमा भएका कमजोरीहरू सुधार्न आवश्यक गृहकार्य भइरहेको बताए ।

मनोहरकुमार पोखरेल