रोकिएको जयपृथ्वी नगरपालिका-३ मा आज मतदान

  ०७४ असार १६ गते

असार १४ गते काङ्ग्रेस र एमालेका कार्यकर्ताबिच झडप भएपछि स्थगित भएको जयपृथ्वी नगरपालिका-३ मा असार १६ गते मतदान भएको छ ।

अत्यन्तै कडा सुरक्षा व्यवस्थाकाबिच सुरु भएको मतदानमा मतदाताको सहभागिता भने उल्लेख्य रहेको छ । १ हजार ३ सय १४ मतदाता रहेको पाण्डु उच्च माध्यमिक विद्यालयमा रहेको मतदान स्थलमा दुई ओटा केन्द्र रहेका छन् ।

मतदानको सुरक्षा व्यवस्थाको अनुगमन गर्न प्रमुख जिल्ला अधिकारी केशवबहादुर थापा, नेपाली सेनाका गुल्मपती राजेश सिंखडा, सशस्त्र प्रहरीकाका डिएसपी भिमबहादुर चन्दलगायतका सुरक्षा अधिकारीहरू मतदान स्थलमा पुगेका थिए ।

ठुलो सङ्ख्यामा सुरक्षाकर्मी परिचालन गरी मतदाता बाहेकका व्यक्तिहरूलाई मतदान स्थलमा प्रवेश निषेध गरिएको छ । मतदान गरिसकेका र हेर्न आएकाहरूलाई मतदानस्थल भन्दा करिव ३ सय मिटर टाढा राखिएको स्थानीय शान्तराज जोशीले बताएका छन् ।

यस मतदान स्थलमा १४ गते खटिएका मतदान अधिकृतहरू पनि परिर्वतन गरिएको छ । मतदान स्थलमा मोबाइल, क्यामरा लगायतका उपकरणको प्रयोगमा पनि बन्देज लगाइएको छ ।


प्रकाश बिक