समाचारहरू

स्थानीय तहको दोस्रो चरणको निर्वाचन नजिकिँदै गर्दा रुपन्देहीमा उम्मेदवार र मतदाताहरूलाई तर्साउने खालका गतिविधिहरु बढ्न थालेका छन् ।

असार ४ गते मनोनयन दर्ता गरेपछिबाट नेकपा एमालेका उम्मेदवारहरूको घरमा बम तथा विस्फोटक पदार्थ राखी आतङ्कतिक बनाउने जस्ता गतिविधिहरु बढ्न थालेको प्रहरीले जनाएको छ ।

असार १० गते राति १० बजे सिद्धार्थनगर नगरपालिकाका एमाले उपमेयर उम्मेदवार उमा काफ्लेको घरमा बोतलमा पेट्रोल हालेर 'होक्स बम' जस्तो देखिने वस्तु फेला परेको जिल्ला प्रहरी कार्यालयका डिएसपी बेलबहादुर पाण्डेले बताए । डिएसपी पाण्डेले यो एउटा अपराधिक मनोवृत्तिको 'प्रोपोगाण्डा' भएको भन्दै यस्ता कार्यमा संलग्नहरूको खोजी कार्य भइरहेको बताए ।

अहिलेसम्म तीन ओटा घटना एमालेका उम्मेदवारलाई लक्षित गरेर भएको प्रहरीको भनाइ छ । दुई दिन अघि मात्र ओमसतिया गाउँपालिकाका अध्यक्षका उम्मेदवार इन्द्रजीत यादवको घरको गेटमा समेत सुतली बम फेला परेको थियो । त्यसैगरी प्रचारमा हिँडेको एमाले टोलीलाई लक्षित गरी एमालेले प्रयोग गरेको गाडीमा पेट्रोल बम प्रहार गरिएको थियो ।

रीमा बि.सी.