समाचारहरू

रुपनी गाउँपालिका–५ बसबिट्टीस्थित वडा कार्यालय भवनमा स्थगित भएको निर्वाचन जेठ २ गते कडा सुरक्षाकाबिच शान्तिपूर्ण रुपमा सम्पन्न भएको छ ।

मतदानस्थलमा १ हजार ५ सय २३ मतदाता रहेकोमा १ हजार २ सय २१ जनाले मतदान गरेको निर्वाचन अधिकृत कुमार मास्केले बताउनु भयो ।

निर्वाचन अधिकृत मास्केका अनुसार ७ सय ८३ पुरुष र ७ सय ४० महिला मतदाता रहेकोमा पुरुषतर्फ ५ सय ८० र महिलातर्फ ६ सय ४१ जना गरी १ हजार २ सय २१ जनाले मतदान गरेका छन् ।

मतदान केन्द्र ‘क’ मा ७ सय ५६ मतदाता रहेकोमा २ सय ६२ पुरुष र ३ सय ५७ महिला तथा मतदान केन्द्र ‘ख’ मा ७ सय ६७ मतदाता रहेकोमा ३ सय १८ पुरुष र २ सय ८४ महिलाले मतदान गरेका छन् ।

मतदानस्थलको सुरक्षाका लागि ठूलो सङ्ख्यामा नेपाल प्रहरी, सशस्त्र प्रहरी र म्यादी प्रहरी परिचालित गरिएको थियो ।

उम्मेदवारहरूलाई आसपास उभिन र पर्यवेक्षकलाई मतदानस्थलमा प्रवेश गर्न निषेध गरिएको थियो । इन्सेक प्रतिनिधिले निर्वाचन अधिकृतसँग छलफल गरेपछि पर्यवेक्षक र पत्रकारहरूलाई मतदानस्थल भित्र प्रवेश गर्न दिइएको थियो ।

रुपनी गाउँपालिकाको १२ मतदानस्थलको २३ मतदान केन्द्रका मतपेटिकाहरू रुपनी गाउँपालिका कार्यालय भवनमा राखिएको र राति ८ बजेदेखि मतगणना सुरु हुने निर्वाचन अधिकृतको कार्यालयले जनाएको छ ।

जम्मा ६ ओटा वडा रहेको रुपनी गाउँपालिकामा एक अन्यसहित ९ हजार ४ सय ८५ पुरुष र ८ हजार ६ सय ७९ महिला गरी १८ हजार १ सय ६५ मतदाता रहेकोमा १४ हजार ४ सय ७७ जनाले मतदान गरेका छन् ।

वैशाख ३० गते साँझ मतदानका विषयमा राजनीतिक दलका कार्यकर्ताबिच झडप भएपछि उत्पन्न असहज अवस्था नियन्त्रणमा लिन प्रहरीले पाँच राउण्ड हवाइ फायर गरेपछि मतदान सम्पन्न हुन नसकी निर्वाचन स्थगित भएको थियो ।

निर्वाचन आयोगका अनुसार स्थगन भएकोमध्ये रुपनीसहित देशका विभिन्न स्थानीय तहका मतदानस्थलअन्तर्गत १३ ओटा मतदान केन्द्रमा जेठ २ गते पुनः निर्वाचन भएको छ ।

मनोहरकुमार पोखरेल