समाचारहरू

बाढी प्रभावितहरूले राहत वितरणमा झेल भएको आरोप लगाउँदै भोक्राहा नर्सिङ गाउँपालिका-७ को वडा कार्यालयमा कात्तिक ५ गते तालाबन्दी गरेका छन् ।

गाउँपालिका र वडा कार्यालयले राहत वितरणमा झेल गरेको आरोप लगाउँदै बाढी प्रभावितहरूले भोक्राहा नर्सिङ गाउँपालिका-७ को वडा कार्यालयमा ०८१ कात्तिक ५ गते तालाबन्दी गरेको स्थानीय गजेन्द्रप्रसाद यादवले बताउनु भयो ।

बाढी प्रभावितहरूलाई राहत वितरणमा विभेद गरेको आरोप लगाउँदै बाढी प्रभावितहरूले ०८१ असोज २३ गते भोक्राहा नर्सिङ गाउँपालिका-७ को वडा कार्यालय घेराऊ गरेका थिए ।

आन्दोलन गरेको दुई साता बितेपनि आफ्ना माग सम्बोधन नभएको आरोपमा भोक्राहा नर्सिङ गाउँपालिका-७ का बाढी प्रभावितहरूले वडा कार्यालयमा तालाबन्दी गरेको बौवालाल यादवले बताउनु भयो । वडाध्यक्ष यादवले वार्ता र सम्वादका माध्यमबाट समस्या समाधान गरिने बताउनु भएको छ ।

बाढी पीडितहरूका लागि राहतको नाममा भ्रष्टाचार भएको र वास्तविक पीडितलाई नदिइ गैरपीडित, पहुँचवालालाई राहत वितरण गरिएको पीडितहरूको आरोप छ ।

वडा कार्यालयमा तालाबन्दी गरिएपछि वडाबाट प्रवाह हुने सरकारी काम प्रभावित भएको छ ।

जयकृष्ण यादव