राष्ट्रिय स्वतन्त्र पार्टीको प्रचारमा प्रयोग गरिएको सवारी अपरिचत व्यक्तिद्वारा तोडफोड

  ०८० वैशाख ८ गते

तनहुँ क्षेत्र नम्बर– १ का राष्ट्रिय स्वतन्त्र पार्टीका उम्मेदवार डा. स्वर्णिम वाग्लेको प्रचार प्रसारमा प्रयोग गरिएको  गाडीमाथि तोडफोड भएको छ ।

व्यास नगरपालिका–३ मालपोत लाईन स्थित सन्तोष होटल अगाडि पार्किङमा राखेको बा. ११ च ४२५० नम्बरको कार वैशाख ७ गते राति अपरिचित समूहले तोडफोड गरेको उम्मेदवार वाग्लेका वुबा जिवन वाग्लेले बताउनु भयो ।

इँटाले प्रहार गरी कारको बायाँ भागको सिसा फुटाइएको छ । दिनभर प्रचार अभियानबाट आएर वाग्ले राति उक्त होटलमा बास बस्नु भएको थियो । बिहान उठेर हेर्दा गाडीको सिसा फुटाएको अवस्थामा भेटिएको वाग्लेले बताउनु भयो ।अन्य समयमा उक्त गाडि उम्मेदवारका वुबाले प्रयोग गर्ने भएपनि चुनावको बेलामा भने प्रचार प्रसारको लागि प्रयोग गरिएकाे थियो ।

जिल्ला प्रहरी कार्यालय तनहुँका एसपी अवदेश विष्टले उक्त गाडीको सिसा कसले र किन फुटाएको भन्ने बारेमा अनुसन्धान सुरू गरिएको बताउनु भयो । उहाँले घटनास्थल वरपरका पोलहरूमा राखिएको सिसि क्यामेराको फुटेज अध्ययन गरेपछि केही खुल्ने बताउनु भयो ।


प्रकाशचन्द्र भट्टराई