समाचारहरू

सुदूरपश्चिम प्रदेशमा राष्ट्रिय सभाका तीन पदका लागि माघ १२ गते सम्पन्न भएको निर्वाचनको इन्सेक सुदूरपश्चिम प्रदेश कार्यालयले पर्यवेक्षण गरेको छ । पर्यवेक्षणका क्रममा राष्ट्रिय सभा सदस्य निर्वाचन शान्तिपुर्वक सम्पन्न भएको छ ।

सुदूरपश्चिम प्रदेश सभाको प्राङ्गणमा ‘क’ र ‘ख’ गरी दुई ओटा मतदान केन्द्रको व्यवस्था गरिएको छ । (क) मतदान केन्द्रमा प्रदेश सभा सदस्यहरुले मतदान गर्ने र (ख) मतदान केन्द्रमा स्थानीय तहका अध्यक्ष, उपाध्यक्ष, प्रमुख र उपप्रमुखले मतदान गर्ने व्यवस्था गरिएको छ ।

५२ जना प्रदेश सभा सदस्य र १ सय ७५ जना स्थानीय तहका अध्यक्ष, उपाध्यक्ष तथा प्रमुख, उपप्रमुख गरी २ सय २७ जनाले बिहान ९ बजेदेखि दिउसो ३ बजेसम्म मतदान गरेका छन् ।

सुदूरपश्चिम प्रदेशमा राष्ट्रिय सभाका तीन पदका लागि ६ जनाले उम्मेदवारी दिएका छन् । जसमध्ये सत्तारुढ गठबन्धनको खुलातर्फ नेपाली काँग्रेसका नारायण मिश्र, दलिततर्फ माओवादी केन्द्रका जगत पार्की र महिलातर्फ एकीकृत समाजवादीका गरिमा शाह र सत्तारुढ गठबन्धन विरुद्ध खुलातर्फ एमालेबाट डिल्लीराज भट्ट, दलिततर्फ नरेश विक र महिलातर्फ सन्तोषकुमारी शर्मा थापा उमेदवार रहनु भएको छ ।

पदेश सभाका ५२ जना मतदातामध्ये एकीकृत समाजवादी पार्टीका १४ जना, माओवादी केन्द्रका १३ जना, नेपाली काँग्रेसका १२ जना, नेकपा एमालेका ११ जना, राष्टिय जनता पार्टीका एक जना र लोकतान्त्रिक समाजवादी पार्टीका एक जना प्रदेश सभा सदस्य रहेका र स्थानीय तहका १ सय ७५ जना मतदातामध्ये नेपाली काँग्रेसका ७४ जना,  नेकपा एमालेका  ७१ जना, माओवादी केन्द्रका १७ जना र एकीकृत समाजवादी पार्टीका १३ जना मतदाताले मतदान गरेको निर्वाचन अधिकृत राइभान कुञ्जेडाले बताउनु भएको छ ।

एक जना प्रदेश सभा सदस्य बराबर ४८ मतभार र एक जना स्थानीय तहका प्रमुख तथा उपप्रमुख बराबर १८ मतभार रहने व्यवस्था रहेको र सतप्रतिशत मतदान भएको निर्वाचन अधिकृत कुञ्जेडाले बताउनु भयो ।

शान्ति सुरक्षालाई ध्यानमा राखेर मतदान स्थलमा सुरक्षाकर्मीहरु परिचालन गरिएको थियो । कोभिड सङ्क्रमण बढदै गएकोले मतदातहरुका लागि कोभिड खोप कार्ड अनिवार्य गरी सुरक्षाको मापदण्ड पूर्ण रुपमा पालना गरी मतदान स्थलमा प्रवेश गर्ने व्यवस्था गरिएको निर्वाचन अधिकृत कुञ्जडाले बताउनु भयो ।

मैनामोती चौधरी