समाचारहरू

राष्ट्रिय सभा सदस्य पदका लागि माघ १२ गते मतदान हुँदैछ ।

प्रदेश १, मा तीन सिटका लागि निर्वाचन हुँदैछ । अन्य, महिला र अपाङ्गता वा अल्पसङ्ख्यक गरि तीन सिटका लागि आठ जनाले उम्मेदवारी दिएका छन् ।

अन्य समूहमा नेपाली काँग्रेसका गोपालकुमार बस्नेत, महिलामा नेकपा एकीकृत समाजवादीकी जयन्ती राई र अपाङ्गता वा अल्पसङ्ख्यकमा जनता समाजवादी पार्टीका हेमराज राईले उम्मेदवारी दिनु भएको छ ।

नेकपा एमालेले अन्यमा गुरु बराल, महिलामा सुमित्रा सुवेदी भण्डारी र अपाङ्गता वा अल्पसङ्ख्यकमा सोनामगेल्जेन शेर्पाको उम्मेदवारी छ । राप्रपाबाट अन्यमा अम्वरबहादुर विष्ट र महिलामा रञ्जु प्याकुरेलले उम्मेदवारीको छ ।

राप्रपासँग गठबन्धनका लागि एमालेले गरेको प्रयास सफल हुन नसकेपछि राप्रपा एक्लै चुनावी मैदानमा छ ।

प्रदेश १ मा स्थानीय तह र प्रदेश गरि ९ हजार ३ सय १२ मतभार छ । जसमा नेकपा एमालेको ४ हजार ५ सय २४ रहेको छ । एमालेको स्थानीय तहमा २ हजार ५ सय ५६ र प्रदेशमा १ हजार ९ सय ६८ मतभार छ । स्थानीय तहका प्रमुख–उपप्रमुख १ सय ४२ जना र प्रदेशका ४१ जना सांसद रहेका छन् ।

पाँच दलीय गठबन्धनको मतभार ४ हजार ६ सय ६८ रहेको छ । गठबन्धनमा काँग्रेस, माओवादी केन्द्र, एकीकृत समाजवादी, जनता समाजवादी पार्टी र सङ्घीय लोकतान्त्रिक राष्ट्रिय मञ्च छन् ।

काँग्रेसको स्थानीय तहमा १ हजार ७ सय २८, प्रदेशमा १ हजार ८ मतभार छ । माओवादी केन्द्रको स्थानीय तहमा २ सय ८८, प्रदेशमा ७ सय २०, एकीकृत समाजवादीको स्थानीय तहमा १ सय ८० र प्रदेशमा ४ सय ८०, जनता समाजवादीको स्थानीय तहमा ७२ र प्रदेशमा १ सय ४४, सङ्घीय लोकतान्त्रिक राष्ट्रिय मञ्चको प्रदेशमा ४८ मत छ ।

राप्रपाको १ सय २० मतभार रहेको छ । राप्रपाको स्थानीयमा ७२ र प्रदेशमा ४८ मतभार छ ।  सत्ता गठबन्धन र एमालेको मतभारको अन्तर १ सय ४४ छ । तर, एमाले प्रदेश सांसद गुलेफुन मियाँ सरकारी कागज किर्ते मुद्दामा फरार रहेकाले एमालेको ४८ मतभार घट्ने देखिएको छ । गुलफेनको खोजी भइरहेको प्रहरीले जनाएको छ ।

राष्ट्रियसभा सदस्य निर्वाचनमा स्थानीय तहका प्रमुख–उप प्रमुख र प्रदेश सांसद मतदाता रहेका छन् । स्थानीय तहका प्रमुख–उपप्रमुखको मतभार १८ र प्रदेश सांसदको मतभार ४८ छ । निर्वाचनमा १ सय ३५ स्थानीय तहका प्रमुख–उपप्रमुख २ सय ७२ र ९२ सांसद गरि ३ सय ६४ मतदाता छन् ।

मतदातालाई खोप कार्ड अनिवार्य-

कोभिड–१९ को बढ्दो सङ्क्रमणका कारण स्वास्थ्य मापदण्ड अनुसार नै मतदाताहरूलाई मतदानस्थलमा प्रवेश दिइने निर्वाचन कार्यालयले तयारी गरेको छ ।

मतदाताहरूलाई खोप कार्ड अनिवार्य गरिएको प्रदेश निर्वाचन कार्यालयका प्रमुख लेवन कश्यप अधिकारीले बताउनु भएको छ । अधिकारीले भन्नुभयो,‘ खोप कार्ड अनिवार्य गरेका छौं । खोप कार्ड मोवाइल खिचेको भए हुन्छ । खोप कार्ड नभएकै कारण मतदानबाट भने वञ्चित गरिने  छैन ।’

माघ १२ गते बिहान ९ बजेदेखि शुरू हुने मतदान दुई स्थानमा हुने तयारी गरिएको छ । प्रदेश निर्वाचन कार्यालयमा स्थानीय तहका प्रमुख–उपप्रमुख र बाली विज्ञान प्रयोगशालामा प्रदेश सांसदहरूका लागि मतदान केन्द्र निर्धारण गरिएको छ ।

कोभिड–१९ सङ्क्रमित मतदाता मतदानस्थलमा आएको खण्डमा पहिलो प्राथमिकता उहाँलाई दिइने निर्वाचन कार्यालयका प्रमुख अधिकारीले बताउनु भयो । दिउँसो ३ बजे मतदान सम्पन्न भएपछि सर्वदलीय बैठक बसेर मतगणना शुरू गरिने निर्वाचन कार्यालयले जनाएको छ ।

इन्सेक प्रदेश १, कार्यालय विराटनगर