समाचारहरू

राष्ट्रिय मानव अधिकार आयोगले ओखलढुङ्गामा निर्वाचन प्रकृयाको अनुगमन गरेको छ । आयोगका अधिकृत अम्बिका घिमिरे नेतृत्वको टोलीले मतदान पूर्व र मतदानको दिनको जिल्लाभर अनुगमन गरेको हो । टोलीले ओखलढुङ्गाका तीन स्थानीय तह र दुई निर्वाचन क्षेत्रको अनुगमन गरेको टोलीका सदस्य लोकनाथ घिमिरेले बताए ।

घिमिरेका अनुसार चिसंखुगढी गाउँपालिकाका सेर्ना, कुइभीर, भदौरे र सिद्धिचरण नगरपालिकाका कडेनी, अधेरी नारायणस्थान, ओखलढुङ्गाको मतदानको अवस्थाको अनुगमन गरेको हो । त्यस्तै सो टोलीले मानेभञ्ज्याङ गाउँपालिकाका भगवीत उमावि र केत्तुकेमा अनुगमन गरेको छ । अनुगमनका क्रममा मतदाता उत्साहित रहेको र शान्तिपूर्वक नै मतदान भएको पाइएको घिमिरेले बताए । आयोगले मतगणना र निर्वाचनपछिको अवस्थाको पनि अनुगमन गर्ने जनाएको छ ।

विभिन्न सङ्घसंस्थाका प्रतिनिधिले मतदानको पर्यवेक्षण गरेका छन् । नियोक, नेपाल मानव अधिकार सङ्गठनले पनि ओखलढुङ्गामा पर्यवेक्षक खटाएका थिए । इन्सेकले मानव अधिकार आयोगको टोलीसँगको सहकार्यमा पर्यवेक्षण गरेको छ ।

शिवप्रसाद ढुङ्गाना