समाचारहरू

राष्ट्रिय मानव अधिकार आयोग क्षेत्रीय कार्यालय नेपालगञ्जको टोलीले जिल्ला कारागार प्यूठानको फागुन १७ गते अनुगमन गरेको छ । जिल्ला कारागारभित्र कैदी बन्दीहरूले भोग्दै आएका समस्याको बारेमा टोलीले अनुगमन गरेको हो ।

राणाकालमा स्थापना भएको घोडा बाँध्ने तवेलामा अवस्थित 'घ' श्रेणीको जिल्ला कारागारमा क्षमता भन्दा तेब्बर कैदी बन्दी राख्नुपर्दा समस्या भएको नाइके रुद्रप्रसाद आचार्यले बताए ।

उनले सरकारले कैदी बन्दीहरूलाई दिने राशन कम भएको गुनासो गर्दै यसको सुनुवाइ गरिदिन आयोगको टोलीसँग अनुरोध गरे । हाल जिल्ला कारागारमा ४७ पुरुष कैदी, १३ महिला कैदी गरी ६० जना कैदी र चार जना थुनुवा रहेको कारागार प्रमुख सुर्यबहादुर पन्तले बताए ।

अनुगमन टोलीमा आयोगका क्षेत्रीय कार्यालयका टङ्क खनाल, द्वारिका अधिकारी, अजितकुमार ठाकुर र इन्सेक जिल्ला प्रतिनिधि रविन्द्र पाण्डे सहभागी थिए । आयोगको टोलीले जिल्लाको शान्ति सुरक्षा, मानव अधिकारको अवस्था, ज्येष्ठ नागरिकको अधिकारको अवस्थालगायतको विषयमा प्रमुख जिल्ला अधिकारी जनकराज पन्त, महिला तथा बालबालिका कार्यालय, प्रहरी प्रमुखसँग भेटघाट तथा छलफलसमेत गरेको थियो ।

रविन्द्र पाण्डे