समाचारहरू

अनुसन्धान, नवप्रवर्तन र आविष्कारको क्षेत्रलाई प्राथमिकतामा राखेर कानुन, नीतिगत व्यवस्था र बजेटको प्रवन्ध गर्नुपर्ने लगायतका चार बुँदे माग राख्दै राष्ट्रिय आविष्कार केन्द्रका संस्थापक अध्यक्ष बैज्ञानिक महावीर पुन ०८० वैशाख १५ गतेदेखि माइतिघर मन्डलामा धर्नामा बस्नुभएको छ ।

पुनले राख्नु भएको मागहरूमा अनुसन्धान र नवप्रवर्तनका लागि हरेक वर्ष सरकारले बजेटको एक प्रतिशत छुट्याउनु पर्ने र उक्त रकम अनुसन्धान, नवप्रवर्तन तथा आविष्कार कोषमा जम्मा गर्नुपर्ने, अनुसन्धान, नवप्रवर्तन तथा आविष्कार प्रवर्द्धन, सञ्चालन तथा खरिद ऐन बनाउनुपर्ने, व्यवहारिक अनुसन्धान तथा नवप्रवर्तन विभाग खोल्नुपर्ने लगायत छन् ।

इन्सेक प्रतिनिधिसँग कुरा गर्दै पुनले सरकारले अनुसन्धान, नवप्रवर्तन र आविष्कार गरेर बनेका र सफलतापूर्वक परीक्षण गरिएका चिजहरूलाई उत्पादन गरेर नव–उद्यमी बन्न चाहने नेपालीहरूलाई उद्यम सुरु गर्नको लागि चाहिने अनुमति, लाइसेन्स, अनुदान तथा सहज ऋण उपलब्ध गराउनुपर्ने र स्वदेशी उत्पादनलाई बजारीकरण गर्न ठोस रूपमा सहयोग गर्नुपर्ने बताउनु भयो ।

पुनले आफूले राखेको माग पूरा नभएसम्म दिनरात धर्नामा बस्ने उल्लेख गर्नुभयो ।

उहाँले भन्नुभयो, ‘हाम्रो आन्दोलन समग्र देशको अर्थतन्त्र सुधार्नका लागि गरिएको आन्दोलन हो, त्यसैले सरकारले अनुसन्धान, नवप्रवर्तन र आविष्कारको क्षेत्रलाई प्राथमिकतामा राखेर कानुन, नीतिगत व्यवस्था र बजेटको प्रवन्ध नगरेसम्म धर्ना रोकिँदैन ।'

विमल पौडेल