समाचारहरू

नेपालगञ्ज उप–महानगरपालिका–१ वीरेन्द्र चोकमा राष्ट्रवादी युवा समूहले राखेको पूर्व राजा वीरेन्द्रको शालिक प्रहरीले हटाए पछि उक्त समूह र प्रहरीबिच जेठ १९ गते झडप भएको छ ।

झडपमा नौ जना प्रहरी समान्य घाइते भएका छन् भने प्रहरीले चार जनालाई गिरफ्तार गरेको प्रहरीले जनाएको छ  ।

त्यस लगत्तै प्रहरीले शालिक हटाएपछि सोही समूहले न्यूरोडमा रहेको सहिद सेतु विकको शालिक तोडफोड गरेको छ ।

पूर्वराजा वीरेन्द्रको अर्ध कदको शालिक प्रहरीले हटाउदा स्थिति नियन्त्रण भन्दा बाहिर जाने अवस्था आएपछि प्रहरीले पाँच राउण्ड हवाई फायरसमेत खोल्नु परेको जिल्ला प्रहरी कार्यालयका डिएसपी मधुसुदन न्यौपानेले जानकारी दिनु भयो ।

घटना लगत्तै नेपालगञ्ज उमनपाका मेयर प्रशान्त विष्ट र उपमेयर कमरुद्दिन राइले घटना स्थलमा पुगेर नेपालगञ्जमा कायम रहेको सामाजिक सद्भावमा खलल नपुर्‍याउन आग्रह गरेका छन् ।

समाचार तयार पार्दासम्म घाइते र गिरफ्तार हुनेहरूको नाम प्रहरीले सार्वजनिक गरेको छैन ।

इन्सेक लुम्बिनी प्रदेश कार्यालय, नेपालगञ्ज