समाचारहरू

राष्ट्रपति रामचन्द्र पौडेलले ०८० वैशाख २० गते मिटरब्याज पीडितको समस्या समाधानका लागि सरकारले सिफारिस गरेको अध्यादेश जारी गर्नुभएको छ ।

राष्ट्रपति पौडेलले मिटरब्याज पीडितको समस्या समाधानका लागि सरकारले ल्याएको मुलुकी संहितासम्बन्धी केही नेपाल ऐनलाई संशोधन गर्ने अध्यादेश ०८० जारी गर्नुभएको हो ।

मिटरब्याज पीडितको समूहसँग ०७९ चैत १७ गते गरेको सहमति अनुसार ०८० वैशाख १९ गते बसेको मन्त्रीपरिषद्को बैठकले संसदको हिउँदे अधिवेशन अन्त्य भएकाले मिटरब्याज पीडितको समस्या समाधानका लागि कानुनी रूप दिन राष्ट्रपति समक्ष अध्यादेश पठाउने निर्णय गरेको थियो ।

मन्त्रीपरिषद्को उक्त सिफारिस अनुसार राष्ट्रपति पौडेलले संविधानको धारा ११४ को उपधारा (१) बमोजिम अध्यादेश जारी गर्नुभएको हो ।

यसैबीच अध्यादेश जारी भएसँगै सरकारसँग ०७९ चैत १८ गते सम्झौता गरेका मिटरब्याजविरुद्धको सङ्घर्ष समिति नेपालसँग आवद्ध अभियन्ता सङ्घर्ष दाहालले इन्सेक प्रतिनिधिसँग कुरा गर्दै सरकारले अध्यादेश मार्फत मिटरब्याजलाई अनुचित लेनदेनको रूपमा परिभाषित गरी सम्बन्धित कानुनमा संशोधन प्रकृया अगाडि बढाएकाले सरकारको यस कदमलाई स्वागतयोग्य भएको बताउनु भयो ।

दाहालले अध्यादेश बमोजिम कानुन संसोधनको प्रक्रियालाई शीघ्र निष्कर्षमा पुर्‍याउन सरकारलाई अनुरोध गर्नुभयो ।

विमल पौडेल