समाचारहरू

कारागार शाखा रामेछापमा क्षमता भन्दा बढी कैदीबन्दी हुँदा कैदी वन्दिहरूलाई समस्या भएको छ । कारागारमा क्षमता भन्दा १ सय ८७ जना बढी कैदीबन्दी रहेका छन् ।

‘घ’ श्रेणीको जिल्ला कारागारको बन्दी क्षमता १ सय जनाको छ । तर, २ सय ६० जना कैैदी र २७ जना थुनुवा गरी २ सय ८७ जना छन् ।

क्षमता भन्दा बढी कैदीबन्दी हुँदा कोचिएर बस्नु पर्ने समस्या भएको कैदिबन्दीहरूले बताए । धेरै कैदीबन्दी हुँदा शौचालय प्रयोग तथा पानीको समेत समस्या हुने गरेको उनीहरूले बताए । यसैगरी कोठामा समेत क्षमताभन्दा बढी बस्नु पर्दा समस्या हुने गरेको उनीहरूको भनाई छ ।

कारागारमा कैदीबन्दीहरूको सङ्ख्या बढे पनि पूर्वाधार भने व्यवस्थित हुन सकेको छैन । कारागारमा उचित पुस्तकालय, सरसफाई, पर्याप्त खेल मैदानलगायतको समस्या रहेको छ ।

कारागार शाखा रामेछापका जेलर प्रमोद अधिकारीका अनुसार जेलमा २०७२ सालका भूकम्पपछि महिला कैदीबन्दी राख्ने भवन भत्किएका कारण महिलाहरूलाई अन्यत्रै सरूवा गरिएको छ ।

भूकम्पपछि जेलमा केही भवनहरू बनेकाले ती भवनहरूको समेत उपयोग गरी कैदीबन्दीहरूलाई व्यवस्थापन गरिएको अधिकारीले बताए । तर, कारागारमा पानीको भने निक्कै समस्या रहेको उनले बताए । ‘दुःख सुख अन्य कुराको व्यवस्थापन गरेका छौँ । तर, पानीको भने निक्कै सङ्कट छ ।’–उनले भने ।

नवराज पथिक