रामेछाप कारागारमा क्षमता भन्दा बढी कैदी बन्दी

  ०७९ माघ ९ गते

रामेछाप कारागारमा क्षमता भन्दा बढी कैदी बन्दी रहेका छन् । ‘घ’ श्रेणीको कारागारको क्षमता २ सय २० जनाको छ । तर कारागारमा त्यसको डेढ गुना बढी अर्थात् ३ सय १७ जना कैदी बन्दी राखिएको छ ।

कारागारमा महिला कैदी बन्दी क्षमता अनुसार नै रहेका भए पनि पुरुष भने क्षमता भन्दा बढी राखेको छ ।

२० जना क्षमता रहेको महिला कारागारमा १८ जना महिला कैदी बन्दी राखिएको छ । जसमा कैद सजाय तोकिएका ११ जना महिला रहेका छन् । त्यस्तै थुनुवा तर्फ ७ जना महिला कारागारमा रहेको कारागारका अहेब राजेन्द्र बस्नेतले जानकारी दिनुभयो ।

२ सय जना पुरुषको क्षमता रहेको पुरुष कारागारमा २ सय ९९ जना कैदी बन्दी रहेका छन् । बस्नेतका अनुसार २ सय ३९ जना कैद सजाय तोकिएका पुरुषहरू कारागारमा छन् भने ६० जना थुनुवा पुरुष रहेका छन् । कारागारमा ७० वर्ष नाघेका ज्येष्ठ नागरिक ६ जना पुरुष रहेका छन् ।

क्षमताभन्दा बढी बन्दी र कैदी हुँदा एउटै कोठामा धेरैजना कोचिएर बस्नु परेको कारागारका बन्दी श्याम घिमिरेले बताउनुभयो । यसरी बस्दा पानी, फोहोरमैला व्यवस्थापन र सरसफाइमा समस्या हुने गरेको छ । सङ्क्रामक र सरुवा रोग फैलिँदा यस्तो अवस्थामा रोग नियन्त्रणमा लिन निक्कै कठिन हुने घिमिरेको भनाइ छ ।

DSC02718


नवराज पथिक