समाचारहरू

रामेछाप कारागारमा सजाय भोगिरहेका उमाकुण्ड गाउँपालिका-६, रोटेका ८४ वर्षीय पदमबहादुर श्रेष्ठको उपचारका क्रममा ०८० भदौ ४ गते मृत्यु भएको छ ।

कारागार कार्यालय, रामेछापका प्रमुख रूपलाल तामाङका अनुसार भदौ ४ गते बिहान शौचालय जाने क्रममा लडेर घाइते हुनुभएका श्रेष्ठलाई तत्काल जिल्ला अस्पताल रामेछापमा भर्ना गरिएको थियो । उहाँको उपचारको क्रममा सोही दिन मृत्यु भएको हो । शवको पोष्टमार्टम भदौ ५ गते सोही अस्पतालमा गरी परिवारलाई बुझाइएको छ ।

१४ वर्षीया र १६ वर्षीया बालिकालाई ०७७ असार २६ गते बलात्कार गरेको भन्दै पीडित पक्षले श्रेष्ठविरूद्ध असार २८ गते जिल्ला प्रहरी कार्यालयमा उजुरी दिएको थियो । प्रहरीले श्रेष्ठलाई असार २६ गते गिरफ्तार गरेको थियो । प्रहरीले श्रेष्ठविरूद्ध ०७७ साउन १२ गते जिल्ला अदालतमा मुद्दा दर्ता गरेकोमा ०७८ कात्तिक ९ गतेको आदेशले ६ वर्ष तीन महिना कारागारको फैसला सुनाएको थियो ।

श्रेष्ठ पक्षघात र उच्च रक्तचापका बिरामी भएको र नियमित औषधि सेवन गर्दै आउनुभएको कारागार प्रमुख तामाङले जानकारी दिनुभयो ।

नवराज घिमिरे