समाचारहरू

प्रदेश पाँचले अस्थायी राजधानी बुटवलमा भव्यताका साथ संविधान दिवस मनाएको छ । कार्यक्रममा विभिन्न समुदायको कला, संस्कृति झल्किने झाँकीहरूले बुटवल सजिएको थियो ।

कार्यक्रममा बोल्दै मुख्यमन्त्री शङ्कर पोखरेलले नेपाली जनताको लामो सङ्घर्ष र बलिदानले नै वंश परम्परामा आधारित सामन्ती राजतन्त्रको अन्त्य गरी जनताका छोराछोरीहरूले शासन व्यवस्थाको नेतृत्व गर्ने लोकतान्त्रिक परिपाटीको निर्माण सम्भव भएको बताउँदै नयाँ संविधानले नै सङ्घीय लोकतान्त्रिक गणतन्त्रलाई विधिवत रूपमा संस्थागत गरेको बताए ।

मन्त्री पोखरलेले भने–‘ऐतिहासिक संविधानसभाबाट नयाँ संविधान जारी भएपछि यतिबेला हामी सङ्घीय लोकतान्त्रिक गणतन्त्रको व्यवहारिक कार्यान्वयनको महत्वपूर्ण चरणमा प्रवेश गरेका छौँ ।’ सो अवसरमा उनले राज्य बलियो नभई संविधानले प्रत्याभूत गरेका मौलिक हकहरूको संरक्षण हुन नसक्ने बताए ।

तीनै तहमा जननिर्वाचित प्रतिनिधिहरूले तहगत संरकारको नेतृत्व सम्हालेदेखि सङ्घीयताको राजनीतिक आधारशीला आधारभूत रूपमा खडा भएको मुख्यमन्त्री पोखरेलले बताए ।

रीमा बि.सी.