समाचारहरू

पोखरिया नगरपालिकाको–४ पोखरिया स्थित श्री जिल्ला उच्चांगल रामदेव कलवार माध्यमिक विद्यालय पोखरियामा ०८० मङ्सिर ५ गते मंगलबार बिदा दिएर राजनीतिक दलको कार्यक्रम आयोजना हुँदा विद्यार्थीहरू पढ्न पाउनु पर्ने अधिकारबाट वञ्चित भएका छन् ।

नेकपा एमाले पार्टीका केन्द्रिय अध्यक्ष एवम् पूर्व प्रधानमन्त्री खड्गप्रसाद (केपी) शर्मा ओलीको प्रमुख आतिथ्यमा आयोजना गरेको बृहत सभा तथा पार्टी प्रवेश कार्यक्रमका कारण मङ्सिर ५ गते विद्यालयमा पठन पाठन सञ्चालन हुन सकेन ।

पूर्व निर्धारित पार्टी प्रवेश कार्यक्रमका कारण विद्यालयमा मङ्सिर ५ गते बिदा दिइएको थियो । विद्यालयहरूमा तिहार र छठ पर्वको बिदा मङ्सिर ४ गते सम्म रहेपनि पार्टी प्रवेश कार्यक्रम कै कारण विद्यालयमा एक दिन थप बिदा बढाएर मङ्सिर ५ गते सम्म बिदा दिइएको थियो । जस कारण विद्यालय सञ्चालन हुन सकेन ।

मंगलबार अर्थात मङ्सिर ५ गते विद्यालय सञ्चालन हुनु पर्नेमा विद्यालय प्राङ्गणमा राजनीतिक दलको कार्यक्रममा पोखरिया नगरपालिकाका मेयर र उपमेयर स्वयम् सहभागि थिए ।

विद्यालयलाई सरकारले शान्ति क्षेत्र र राजनीतिक दलको कार्यक्रम निषेधित क्षेत्र घोषणा गरे पनि शिर्ष दलको शिर्ष नेता नै सहभागि भएको कार्यक्रम आयोजना हुँदा विद्यार्थीहरू मार्कामा परेका हुन् ।

विद्यालयमा तिहार र छठको बिदा नै रहेको नगरपालिकाका मेयर प्रदुमन चौहानले बताउनु भयो । तिहार र छठको बिदा मङ्सिर ४ गते सम्म रहेपनि पार्टी कै कार्यक्रमको कारण एक दिन थप गरी मङ्सिर ५ गतेसम्म बिदा दिइएको हो भनि इन्सेक प्रतिनिधिको प्रश्नको प्रतिउत्तरमा त्यस्तो नै भएको हुन सक्ने उहाँले बताउनु भयो ।

नगरपालिकाका शिक्षा शाखा प्रमुख विजय झाले नगरपालिका अन्तर्गतको सबै विद्यालयमा मङ्सिर ५ गते सम्म बिदा दिइएको बताउनु भयो । उहाँले छठ पर्वको भोलि पल्ट विद्यालयमा कम विद्यार्थीको उपस्थिति हुने भएकोले स्थानीय तहबाट थप एक दिन बिदा दिइएको बताउनु भयो ।

शम्भुकुमार सुमन