समाचारहरू

काठमाडौँमा आयोजित एक कार्यक्रमका सहभागी सरोकारवालाहरूले कुनै पनि दल वा सङ्गठनले राजनीतिक अस्त्र र लाभका लागि विद्यालय र बालबालिका प्रयोग गर्न नहुने बताएका छन् ।

विद्यालयमा बमकाण्डविरूद्ध नागरिक समाजका सञ्जालहरूको साझा पहल-२०७३ को आयोजनामा काठमाडौँमा गरिएको छलफल कार्यक्रममा सरोकारवालाहरूले उक्त कुरा बताएका हुन् ।

काठमाडौँ र ललितपुर जिल्लाका आधा दर्जन भन्दा बढी विद्यालयमा असोज ४ गते बम विष्फोट तथा विष्फोटक पदार्थ राखिएको घटनाका विषयमा सिजप, एनसिएपी, एटवीन, एजुकेश्नल जर्नालिष्ट ग्रुप, बालगृह सञ्जाल नेपाललगायतका संस्थाले असोज ५ गते संयुक्त रूपमा आयोजना गरेको छलफल कार्यक्रम आयोजना गरेका थिए ।

सरोकारवालाहरूले विद्यालय शान्ति क्षेत्र भएको र कुनै पनि व्यक्ति, समूह, सङ्गठन वा दलले आफ्नो स्वार्थ प्राप्तिका लागि बालबालिकाहरूको जीवन वा उनीहरूको पठनपाठन गर्न पाउने अधिकारप्रति खेलवाड गर्न नहुने भन्दै बम विष्फोट घटना आतातीय भएको बताएका छन् ।

नेपाल शिक्षक महासंघका महासचिव तिलक शर्माले कसैलाई पनि बालबालिकाको ज्यान लिने र उनीहरूलाई पठनपाठन गर्न पाउने अधिकारबाट वञ्चित गराउने अधिकार नभएको बताए ।

एन प्याव्सनका अध्यक्ष कर्ण शाहीले विद्यालय शान्ति क्षेत्र घोषणा कागजमा समिति भएकोप्रति खेद प्रकट गर्दै बम विष्फोट गराउने समूहले राखेको माग छलफलबाट टुङ्ग्याउनुपर्ने बताए ।

उनले कमजोर शिक्षा नीति र सरकारको प्रमुख प्राथमिकतामा विद्यालय क्षेत्र नपरेकै कारण राजनीतिक कुसंस्कारको विकास भएको बताए । उनले सरकारको उदासिनताका कारण बालबालिकाहरू पढ्न पाउने अधिकारबाट वञ्चित हुने गरेको उल्लेख गरे ।

बालबालिका शान्ति क्षेत्र राष्ट्रिय अभियान (सिजप)का अध्यक्ष कृष्ण सुवेदीले राजनीतिक उद्देश्य प्राप्तिका लागि हतियार उठाउने दिन गइसकेको भनी सबै पक्षले बुझन आवश्यक भएको बताए । अध्यक्ष सुवेदीले आन्दोलनको स्वरूप परिवर्तन गरी आफ्ना माग राख्न सबैमा आग्रह गर्दै भविष्यमा यस्ता घटना हुन नदिन राज्यले तत्काल गम्भीर कदम चाल्न आवश्यक रहेको बताए ।

शिक्षा विभागकी प्रतिनिधि कमला ज्ञवालीले शिक्षा विभागका प्रतिनिधि कमला ज्ञवालीले विभिन्न विद्यालयमा भइरहेको बमकाण्डका कारण विद्यालय र विद्यार्थी असुरक्षित रहेकाले विद्यालयलाई शान्ति क्षेत्र कायम गर्न मन्त्रालयले केन्द्रीय शान्ति सुरक्षा अनुगमन समितिसँग छिट्टै बैठक बस्ने जानकारी दिइन् ।

शिक्षाका लागि राष्ट्रिय अभियानका सुरेन्द्रमान श्रेष्ठले बम विष्फोट घटनाले विद्यालय क्षेत्रलाई आतङ्कित तुल्याएको भन्दै बालबालिकाहरूलाई मानसिक, शारीरिक तथा भौतिक क्षति पुगेको बताए । उनले शिक्षा क्षेत्रमा देखिएको विकृति र शिक्षाको अधिकारको सुनिश्चितताका लागि सबै सङ्घसंस्था र सरोकारवाला निकाय एकजुट हुनुपर्ने बताए ।

अनेरास्ववियुका प्रवक्ता तथा सचिव आरसी लामिछानेले बम विष्फोट घटना आफ्ना कुरा राख्न सक्ने नैतिक धरातल समाप्त भएपछिको परिणाम भएको टिप्पणी गरे । उनले बम विष्फोट घटनाको घोर भत्र्सना गर्दै हिंसात्मक आन्दोलन आजको आवश्यकता नभएको भन्दै आन्दोलनको स्वरूपलाई सबै दल वा सङ्गठनले पुनर्विचार गर्नुपर्ने बताए । प्रवक्ता लामिछानेले विद्यालयमा बम विस्फोट गराउने समूह राजनीतिक समूह नभई अपराधिक समूह भएको भन्दै घटनामा संलग्न अपारधीलाई कारबाही गर्न माग गरे ।

नेपाल विद्यार्थी सङ्घका अध्यक्ष नैनसिंह महरले बम विष्फोट घटना हिंसात्मक गतिविधि भएको भन्दै घटनालाई राज्यले गम्भीरताका साथ लिनुपर्ने बताए ।

विवेक ढुङ्गाना