समाचारहरू

पर्वतमा रक्त सञ्चार सेवा केन्द्र (ब्लड बैङ्क) नहुँदा सेवाग्राहीहरुलाई समस्या भएको छ ।

नेपाल रेडक्रस सोसाइटी पर्वतले रक्त सञ्चार केन्द्र सञ्चालनमा ल्याउने गरी गत बर्ष सुरुवात गरेपनि कर्मचारी अभाव र प्रविधि लगायतका समस्याले सञ्चालनमा ल्याउन नसकेपछि अहिले समस्या भएको छ ।

जिल्लामा एक सरकारी स्वामित्वको अस्पताल सहित विभिन्न नीजि स्वास्थ्य संस्थाहरु रहेपनि त्यहाँ उपचारका लागि आउने बिरामीहरूका लागि रगत अभाव हुने गरेको छ ।

पछिल्लो समय पर्वत अस्पतालमा शल्यक्रिया सेवा समेत सञ्चालनमा आएपछि रगतको अभाव झनै खड्किएको छ ।

‘शल्यक्रिया गर्नुपर्ने बिरामीलाई रगत आवश्यक पर्छ, तर रगतको व्यवस्थापन हुन नसक्दा बिरामी अन्यत्र पठाउनुपर्ने अवस्था आएको छ ।’– जिल्ला अस्पताल पर्वतका मेडिकल सुपरिटेण्डेण्ट डाक्टर ढुण्डिराज पौडेलले बताउनुभयो ।

कतिपय बिरामीहरुका लागि सामाजिक सञ्जालबाट दाताहरुलाई हारगुहार गरेर समस्या समाधान गर्ने गरेको उहाँले बताउनुभयो ।

कुश्मा नगरपालिका–७ का प्रबिण धितालले असोज १५ गते पत्नी सरस्वती धिताल प्रसुति हुँदा शल्यक्रिया गर्नुपर्ने भएको र रगत उपलब्ध नहुँदा समस्या परेको बताउनुभयो ।

‘श्रीमती अस्पताल भर्ना भएपछि डाक्टरले रगत ल्याउन भन्नुभयो । मैले रेडक्रसमा खोजे तर भेटिन, त्यसपछि साथीलाई भनेर रक्तदान गरी रगत उपलब्ध गराइएको थियो ।’– उहाँले भन्नुभयो ।

उहाँले नेपाल आर्मीको केबल जङ्ग गुल्ममा कार्यरत युवालाई आफै अनुरोध गरेपछि समस्या समाधान भएको बताउनुभयो ।

रक्त सञ्चार केन्द्रको लागि पटकपटक आग्रह र आवश्यक उपकरण सामाग्री अस्पतालबाट उपलब्ध गराएपनि रेडक्रसले खासै चासो नदिएको अस्पताल व्यवस्थापन समितिका अध्यक्ष गोविन्द पहाडीले बताउनुभयो ।

जिल्लामा ब्लड बैङ्क भएमा बिरामीलाई चाहिने रगत खोज्न भौतारिनुपर्ने बाध्यताको अन्त्य हुने उहाँले बताउनुभयो ।

नेपाल रेडक्रस सोसाइटी जिल्ला शाखाका सभापति रुद्र रिमालले माग अनुसारको रगत पुग्ने गरी दिन नसकेको स्विकार गर्नुभएको छ ।

उहाँले अस्पताल तथा अन्य निकायबाट आधुनिक उपकरणहरु प्राप्त भएको भएपनि त्यसलाई व्यवस्थित गर्दै अगाडि बढ्न नसकेको र सेवा सञ्चालनका लागि प्रयासरत रहेको बताउनुभयो ।

सन्तोष थापा