समाचारहरू

सिलिचोङ गाउँपालिका-१ बेसिन्दामा पहिरोबाट विस्थापित ५५ परिवारको घर निर्माण अलपत्र भएको छ ।

सिलिचोङ-१ बेसिन्दाका ९७ घर परिवार ०७७ असार २८ गते राति आएको पहिराले  विस्थापित भएका थिए ।  पहिरोबाट विस्थापित बेसिन्दाका ५५ परिवारका लागि खाँदबारी नगरपालिका-७ स्थित भैरे डाँडामा घर निर्माण थालिएको भएपनि ०८० माघ महिनादेखि घर निर्माण रोकिएको हो । पहिरो पीडितको समयमा घर निर्माण हुन नसक्दा अझै टेण्टमै कष्टपूर्ण जीवन बिताउन बाध्य छन् ।

समयमा घर निर्माण हुन नसक्दा सिलिचोङ-१ बेसिन्दाका पहिरोबाट विस्थापित ५५ परिवारको चार वर्षयता पुनः स्थापना हुन सकेको छैन ।

जिल्ला विपद् व्यवस्थापन समितिको खातामा रकम नआउँदा ०८० माघ महिनाबाट घर निर्माण रोकिएको खाँदबारी नगरपालिका-७ का कार्यवाहक वडाध्यक्ष झलक कुसुलेले बताउनु भयो ।

सरकारले घर निर्माणका लागि दिने भनेको ५ लाख रुपियाँ रकम जिल्ला विपद् व्यवस्थापन समितिले भुक्तानी नगर्दा घर निर्माण बिचैमा अलपत्र परेको कार्यवाहक वडाध्यक्ष कुसुलेले बताउनु भयो । उहाँका अनुसार ५५ घरमध्ये २५ घरको ५० प्रतिशत बढी काम सकिएको छ । अन्य घरको २५ प्रतिशत मात्र काम सकिएको छ ।

पहिरोबाट विस्थापित भएको झण्डै साढे दुई वर्षपछि बेसिन्दा गाउँका पहिरो पीडितको घर निर्माण थालिएको हो । घर निर्माण अलपत्र भएपछि अस्थायी टहरामा बस्दै आएको पहिरो पीडित परिवार थप पीडामा परेका छन् ।

पहिरो पीडितका लागि सङ्घीय सरकारले ६० प्रतिशत, प्रदेश सरकारले ३० प्रतिशत र स्थानीय सरकारले १० प्रतिशत बजेट उपलबध गराउने निर्णय भएको थियो । सङ्घीय सरकारबाट रकम नआएपछि घर निर्माणको भुक्तानी गर्न नसकिएको प्रमुख जिल्ला अधिकारी ध्रुवबहादुर खड्काले बताउनु भयो ।

पहिरो पीडितको आवास निर्माणका लागि ५ लाख ५० रुपियाँ तोकिएको थियो । आवास निर्माणको ५ लाख ५० रुपियाँ रकम प्राविधिकको मूल्याङ्कन अनुसार तीन किस्तामा भुक्तानी गरिने सम्झौता भएपनि हालसम्म ५० हजार रुपियाँ मात्र भुक्तानी पाएका छन् ।

भैरे डाडाँमा ५५ परिवारको लागि ६९ रोपनी जग्गा १ करोड ३० लाखमा खरिद गरिएको थियो ।  पहिरोबाट विस्थापित ९७ परिवारमध्ये २५ घर चित्रे, १२ परिवार बखल्टुमटार र ५५ परिवार खाँदबारी अस्थायी रुपमा बसिरहेका छन् । पहिरो पीडितका लागि चित्रेमा ५१ दशमलव ५ रोपनी ७० लाख र बखल्टुममा १७ दशमलब ५ रोपनी ३४ लाखमा खरिद गरि पहिरो विस्थापितको नाममा संयुक्त रजिस्ट्रेशन पास गरिएको छ । सिलिचोङ-१ बेसिन्दाका नौ ओटा घर ओटा ०७७ असार २८ गते राति आएको पहिराले बगाउँदा ११ जना बेपत्ता भएका थिए ।

भविन कार्की