समाचारहरू

विद्यालयमा अध्ययनरत बालबालिकालाई अप्राकृतिक यौन अपराध गरेको आरोपमा फलेवास नपा-६ देविस्थानमा सञ्चालित माझीगाउँ आधारभूत विद्यालयका प्रधानाध्यापक खिमप्रसाद शर्मालाई साउन ६ गते गिरफ्तार गरेको छ ।

५० वर्षीय प्रधानाध्यापक खिमप्रसाद शर्माले विद्यालयमा विगत एक वर्षदेखि ७ वर्षदेखि १२ वर्षसम्मका ४ जना बालिकालाई यौन हिंसा गरेको आरोप लागेको छ ।

छोरी टोलाउने, एकसुर हुने र बेलाबखत बिरामी हुने गरेपछि चिकित्सकले समेत फोबिया भएको बताएपछि छोरीलाई सोध्दा शिक्षकले हिंसा गर्दै आएको थाहा भएको एक पीडित बालिकाकी आमाले बताइन् ।

बालिकाहरूले अभिभावकसँग शिक्षकले हिंसा गरेको कुरा बताएपछि साउन ६ गते विद्यालयमा अभिभावक, शिक्षक र विद्यार्थीसहित छलफल गरिएको थियो ।

छलफलका क्रममा पीडित बालिकाहरूले प्रधानाध्यापकले आफूहरूलाई गर्ने व्यवहार सबैलाई बताएपछि देविस्थान प्रहरी चौकी फलेवासले प्रधानाध्यापकलाई नियन्त्रणमा लिएर सोही दिन जिल्ला प्रहरी कार्यालय पर्वतमा बुझाएको थियो ।

जिल्ला प्रहरी कार्यालय पर्वतले साउन ७ गते पीडित पक्षको लिखित उजुरी दर्ता गरेको छ । घटनाका आरोपित र पीडित पक्षसँग घटनासम्बन्धी सोधपुछ र अनुसन्धान कार्य अघि बढाइएको जिल्ला प्रहरी कार्यालय, पर्वतका डिएसपी दिलिप घिमिरेले जानकारी दिए ।

सन्तोष थापा