यौन दुर्व्यवहारको मुद्दा मुल्तबीमा राख्ने फैसला

  ०७८ चैत १५ गते

१२ वर्षीया बालिकालाई छिन्नमस्ता गाउँपालिका–२ कुपही रम्पुराका १८ वर्षीय इन्दल खंगले यौन दुर्व्यवहार गरेको मुद्दा सप्तरी जिल्ला अदालतले चैत १४ गते मुल्तबीमा राख्ने फैसला गरेको छ ।

जिल्ला अदालतमा ०७६ भदौ २९ गते दायर भएको सो मुद्दा न्यायाधीश राजेन्द्रकुमार श्रेष्ठको इजलासबाट मुल्तबीमा राख्ने फैसला भएको हो ।

पीडित बालिकालाई आरोपितले ०७५ असोज १ गते यौन दुर्व्यवहार गरेको भन्दै पीडितका बुबाले जिल्ला प्रहरी कार्यालयमा असोज २ गते उजुरी दिएका थिए ।

पीडित बालिकाको स्वास्थ्य परीक्षण राजविराजस्थित गजेन्द्रनारायण सिंह अस्पतालमा ०७५ असोज ३ गते गरिएको थियो ।

विश्वकर्मा पूजाको अवसरमा भएको सांस्कृतिक कार्यक्रम हेर्न टोलका महिलाहरूसँग गएकी पीडित पिसाब फेर्न गएको मौका छोपी आरोपितले यौन दुर्व्यवहार गरेको पीडितले आरोप लगाएकी थिइन् ।

गुहारको लागि चिच्याए पनि सांस्कृतिक कार्यक्रमको माइकको साउण्डले कसैले नसुनेको पीडितले बताएकी थिइन् ।

जिल्ला प्रहरी कार्यालयले ०७५ असोज ४ गते उजुरी दर्ता गरेको थियो । आरोपित फरार रहेकाले हालसम्म गिरफ्तार गर्न नसकिएको प्रहरीले जनाएको छ ।


मनोहरकुमार पोखरेल