समाचारहरू

धरान उमनपा- १८ मा रहेको विपी कोइराला स्वास्थ्य विज्ञान प्रतिष्ठानमा कार्यरत २४ वर्षीया महिला सुरक्षागार्ड माथि भएको यौन दुर्व्यहारको घटना प्रमुख जिल्ला अधिकारीले असोज ५ गते साँझ मिलापत्र गराएका छन् ।

सुनसरीका प्रमुख जिल्ला अधिकारी मोहनबहादुर चापागाईँ, जिल्ला प्रहरी कार्यालयका एसपी पोषराज पोखरेलसहितले यौनजन्य दुर्व्यहार गर्ने आरोपितहरूलाई उन्मुक्ति दिएका हुन् ।

प्रतिष्ठान धरानको सुरक्षाका लागि ठेक्का पाएको केटिएम सेक्युरिटी सर्भिसका व्रान्ड एम्बेसडर एवम् हास्यकलाकार सन्तोष पन्त र केटिएम सञ्चालक रामेश्वर शाहले भदौ १ गते २४ वर्षीया एक महिला सुरक्षाकर्मी माथि यौन दुर्व्यवहार गरेको पीडितले आरोप लगाएकी छन्।

दुर्व्यवहार पछि पीडितले प्रहरीमा उजुरी दिन खोज्दा प्रहरीले उजुरी लिन नमानेको पीडितले बताइन् । प्रहरीले उजुरी नलिएपछि जिल्ला प्रशासन कार्यालय पुगेकी पीडितलाई जबरजस्ती मिलापत्र गराइएको हो ।

प्रशासनमा उजुरी परेपछि प्रतिष्ठानका उपकुलपतिको कार्यालयमा भएको छलफलमा पीडितलाई मिलापत्र गराइएको हो । यस विषयमा प्रमुख जिल्ला अधिकारी मोहनबहादुर चापागाईँले द्वन्द्व निराकरणका लागि मिलापत्र गराइएको प्रतिक्रिया दिए ।

यसैबीच यौन दुर्व्यवहारको घटनामा मिलापत्र गराउन भएको छलफलमा पुगेका धरानका चारजना पत्रकारलाई प्रमुख जिल्ला अधिकारी मोहनबहादुर चापागाईँले दुर्व्यवहार गरेको पत्रकारहरूले आरोप लगाएका छन् ।

छलफलको रिपोर्टिङ गर्न पुगेका कान्तिपुर दैनिकका सम्वाददाता धरान उमनपा-१५ का ४० वर्षीय प्रदीप मेयाङबो, विजयपुर एफएमका सह सम्पादक तथा औजार दैनिकका कार्यकारी सम्पादक धरान उमनपा-२३ का ३५ वर्षीय रणध्वज लोहार, पूर्णाङ्क साप्ताहिकका कार्यकारी सम्पादक धरान-१७ का ४० वर्षीय जनकऋषी राई र नेपाल पत्रकार महासङ्घ सुनसरीका कोषाध्यक्ष धरान-१९ का ३३ वर्षीय विकास चाम्लिङ माथि दुर्व्यवहार भएको हो ।

दुर्व्यवहार पछि प्रमुख जिल्ला अधिकारी मोहनबहादुर चापागाईँले पत्रकार महासङ्घ सुनसरीका अध्यक्ष केशव घिमिरेसहितको पत्रकार टोली समक्ष माफी मागेका थिए । उनले पत्रकार नचिनेको र आवेशमा आएर आफूबाट गल्ति भएको भन्दै गल्ती स्वीकार गरेर माफी मागेको घिमिरेले बताए ।

शेखर ढकाल