समाचारहरू

१७ वर्षीया बालिकालाई यौन दुर्व्यवहार गरेको कसुरमा बोदे बर्साइन नगरपालिका–८ काचनका २१ वर्षीय छोटु र ईबरेन्द्र भनिने यिवरेन्द्रकुमार यादवलाई जिल्ला अदालतबाट भदौ ३१ गते कैद तथा जरिबाना भएको छ ।

न्यायाधीश हरिश्चन्द्र ईङ्गनामको इजलासले आरोपितलाई कसुर ठहर गर्दै २० दिनको कैद फैसला भएको अदालतले जनाएको छ । यसका साथै आरोपितलाई ५ हजार रुपियँ जरिबाना गर्ने, ३० हजार रुपियाँ पीडितलाई क्षतिपूर्ति भराउने र फौजादरी कसुर पीडित राहत कोषमा २ सय रुपियाँ जम्मा गर्न लगाउने फैसला भएको छ ।

आरोपितले २०७९ असोज २४ गते राति बाल यौन दुर्व्यवहार गरेको भन्दै पीडितका बुबाले ०७९ असोज २६ गते इलाका प्रहरी कार्यालय कडरबोनामा उजुरी दिनुभएको थियो । इलाका प्रहरी कार्यालय कडरबोनाले असोज ३० गते गजेन्द्रनारायण सिंह अस्पतालमा स्वास्थ्य परीक्षण गरी बाल यौन दुर्व्यवहारमा उजुरी दर्ता गरेको थियो । पीडितको घरमा आरोपितले पछाडिबाट समाती यौन दुर्व्यवहार गर्दा पीडित जोरजोरले रुन कराउन थालेपछि आरोपित फरार भएको पीडितले बताउनु भयो ।

इलाका प्रहरी कार्यालय कडरबोनाले २०७९ असोज ३० गते आरोपितलाई गिरफ्तार गरी उजुरी दर्ता गरेको थियो । सप्तरी जिल्ला अदालतमा ०७९ कात्तिक २१ गते अभियोगपत्र दायर भएकोमा जिल्ला न्यायाधीश श्यामबिहारी मौर्यको इजलासबाट कात्तिक २२ गते १ लाख रुपियाँ धरौटी माग गर्ने आदेश भएको थियो ।

मनोहरकुमार पोखरेल